ممرض صدر دمنهور المصاب بكورونا: “خلوا بالكم من نفسكو الموضوع بجد مش هزار”

حذر محمد بيومي ممرض مستشفي صدر دمنهور بالبحيرة، والذي أصيب مؤخرا بفيروس كورونا المستجد، المواطنين من التجمعات في الأسواق وغيرها وأخذ الحيطة وارتداء الكمامة الطبية والتعقيم والتطهير بشكل دائم للحد من انتشار الفيروس.

وتداول عدد من مستخدمي موقع التواصل الإجتماعي “فيس بوك” بالبحيرة، فيديو لممرض مستشفي صدر دمنهور المصاب بفيروس كورونا، حيث ظهر الممرض قائلا” أنا محمد بيومي تمريض مستشفى الصدر في دمنهور, بوجه كل الشكر والتقدير لكل واحد سأل عليا, وكل التقدير وكل الاحترام لتمريض مستشفى الصدر في دمنهور على الدعم الكبير معايا”.

وتابع قائلا” انا راجل شغال في المستشفى وواخد كل الإجراءات الاحترازية ومع ذلك أتصابت بفيروس كورونا، يا جماعة الموضوع مش سهل كل واحد لازم ياخد الاحتياطات كاملة، الناس بتستهر وفاكرة أن الموضوع مش بجد، يا جماعة نلتزم بيوتنا وناخد كل الإجراءات الاحترازية نغسل أيدينا بالمية والصابون والكحل وربنا يزيح الغمة دي من علينا”.

وأشار ممرض صدر دمنهور قائلا” الحكومة مش مقصرة والطاقم الطبي مش مقصر وكل التقصير من عند الناس، الناس اللي بتتجمع، والناس اللي مكبرة دماغها وإيه يا عم كبر دماغك، انا راجل زى ما بقول ليكم ما استهونتش بالموضوع وفى الأخر أتصابت، إحنا بنعمل كل ده علشان خاطر الناس”.

واستطرد حديثه: “يا جماعة خلوا بالكم من نفسكم الحكومة بتعمل كل اللي في وسعها والأطقم الطبية قايمة بدورها, كل الشكر والتقدير لمدير مستشفى الصدر في دمنهور الدكتور أحمد بريقع والدكتور محمد سعيد عمارة والدكتور محمود عبد العال, لازم ياجماعة نقف جنب بعض مش وقت مطالب بالرغم من إن في ناس أتصابت مننا، لكن إحنا في وقت كل واحد يخلي باله من نفسه”.

محذرا المواطنين “خلوا بالكم من نفسكم الموضوع بجد مش هزار وان شاء الله وبإذن الله انا زى الفل انا وكل اسرتى علشان الناس تطمن وتستوعب الموضوع انا الحمد الله بكلمكم عادي وكل المشكلة اللي عندي حاجة بسيطة وبالدليل أنى مرحتش مستشفى وبطمن كل الناس اللي في المنطقة عندي”.

وتابع” بكرر كل أسرتي كويسة زوجتي وأمي واخواتى كلهم كويسين, مفيش داعي للقلق, القلق والتوتر انتم اللي بتعملوه لما نلاقي في تجمع في سوق الفسيخ بالعدد والكم الكبير ده يبقي الاستهتار والعدوى انتم اللي بتصدروا للناس وللأطقم الطبية وإحنا شغالين في المستشفيات، وبتصدروا الإصابات لينا لان الإصابات بتزيد منكم، لما أروح على كوبري افلاقة وألاقي الإعداد الكبيرة دى في الأسواق يا جماعة لازم ناخد حرص اكبر من كدا يا جماعة إحنا دخلنا في الذروة ومينفعش كده”.

وأختتم قائلا “يا جماعة كل الشكر والتقدير للأستاذ السيد الرفاعي اللي دعمني ووقف جنبي بس هو قالي لازم يا محمد تطلع وتطمن الناس انك بخير, وانا كويس وبخير وبطلب منكم عدم الاستهتار وخلو بالكم من نفسكم، وأهم حاجة التعقيم وعدم الازدحام وكل الإجراءات تتاخد بره وجوه البيت، الكمامة والمية والصابون وعدم التعرض للتجمعات وانا يا جماعة كويس وبخير وزي الفل”.

يشار إلى أن الإصابات بفيروس كورونا المستجد في طاقم التمريض بمستشفي صدر دمنهور، بلغت حتى أمس السبت 10 حالات، بينهم حالة وفاة بخلاف الإصابات التي لحقت بمخالطيهم من أسرهم وذويهم.