أول تعليق من صاحبة تمثال صلاح في منتدي الشباب: “مش أنا السبب” (صور)

علقت مى عبد الله، الفنانة التشكيلية، وصانعة تمثال محمد صلاح، بمنتدى شباب العالم، بمدينة شرم الشيخ، قائلة:”لما بدأت ف التمثال مكنتش عاملاه لمنتدي الشباب، ولا للمعرض بدأته هنا معاكم، وكنت بشرح خطوة بخطوة والمراحل، ووصلنا مع بعض لمرحلة كويسة، وكنت بعمله بس لغرض أن الناس اللي مش مختصة وعندها الموهبه وعاوزه تتعلم تعرف خطوات بسيطه تمهدلها الطريق أنها تبدأ مشوارها واللي عاوز يتأكد يرجع في بوستاتي شويه هيلاقي كل التفاصيل، وأزاي الناس كانت بتستفيد”.

وأضافت “مى”، عبر صفحتها على الفيس بوك:”يعني مكنش غرضي أعمل تصميم جامد ولا فكرة خرافية قد ما كان قصدي أساعد الناس الي بتسألني، وناس كتير تابعت الخطوات معايا وعرفو أزاي يبدأو لوحدهم من أول ما بيروحو للحداد ويعملو كاريكاز لحد ما يخلصو الشغل ويصبوه كمان بغض النظر عن الشغل دا هو ايه دا كان مجرد مثال بشرح عليه، وكنت بخلصه بسرعه بسرعه عشان كنت بنزل مل يوم خطوه مع أني كنت مضغوطه في شغل المعرض بس حتي لو شخص واخد استفاد كنت بفرح”.

وتابعت “مى”،:”ومع أن ناس كتير ادايقت مني وقالتلي متكمليش خطوات ودي أسرار شغل زي ما سموها الإ أني أصريت وكملت عشان يمكن افيد حتي شخص واحد، وتاني خطوة لما قررت أكمله للمنتدي وصلت لمرحله الجبس اللي لونه أبيض فيها دي، وكان عاجبني ومقتنعه بيه، وأنا عموما مبحبش حد يمد أيده ف شغلي خالص عشان التفاصيل بتفرق،المهم لما المنتدي قررو انه لازم يبقي التمثال برونز اضطريت اني اخلي حد يصبه برونز، والصب دا بياخد وقت كبير ومجهود بيحول التمثال من خامه الجبس لخامه النحاس”.

وأشارت “مى”، إلى أنها تفاجأت أخر يوم قبل تسليم التمثال للمنتدي أنه كده! اعمل إيه يعني؟مقدرش مسلموش ولا أقدر أقولهم معملتش شغل لأنهم في المنتدي صارفين عليه وعاوزينه لو معرضي الخاص، مكنتش عرضته غير وأنا راضيه عنه، المهم أنه طلع ف النهايه النتيجه دي، وأنا مش مدايقه ولا زعلان، ولا ندمانه لأني عملت اللي عليا وأكتر وربنا عالم بتعبي فوق ما أي حد يتخيل ومادام أنا عملت اللي عليا ومقصرتش فدي إرادة ربنا أنه التمثال باظ ف الاخر والتعليقات السلبيه مش هتحبطني”.

وأختتمت “مى” حديثها، قائلة:”ولا هتأثر فيا خالص أقسم بالله بس ياريت الناس تتعلم فن النقد بأدب واحترام، لأن مش أي حد يستحمل نقد زي دا. أنا الحمد لله قوية، ولو مش قوية مكنتش عملت مشروع التخرج اللي مصر كلها اتكلمت عليه. ولا كنت كملت لكن أنا هكمل وهفاجأكم في مشروعي القادم الي التمثال ده بالنسباله ولا حاجه ٢٢ تمثال في معرضي القادم أخر الشهر”.