من نص التحقيقات.. هدير الهادي: “فيديوهاتي عادية بحرك فيها شفايفي بس”
ينشر “القاهرة 24” نص التحقيقات فى القضية رقم 1791 لسنة 2020 حصر جرائم اقتصادية، والمتهمة فيها هدير الهادي، في القضية المعروفة إعلاميًا بـ”فتاة التيك توك”، لاتهامها بالتحريض على الفسق والفجور ونشر عادات تخالف قيم وتقاليد المجتمع المصري..
س: ما هي ظروف نشأتك؟ ج: أنا اتولدت في قرية سيدي غازي، في أسرة من أب وأم وليا أخين أصغر مني، الأول اسمه عبد الهادي والثاني اسمه عبد الغني وبابا وماما انفصلوا وأنا في ثانوية عامة، وبعدين رجعوا لبعض تاني من شهور، وعايشين في البحيرة.
هدير الهادي: “دكتور مصري في السعودية كان بيحولي دولارت.. وكشفوا عليا علشان الفيديو الإباحي” (اعترافات)
س: ما عمل والدك ووالدتك؟ ج: بابا رجل أعمال معاه معرض سيارات وتلاجات، وماما مش شغالة. س: وما هي ظروف حياة إخوتك؟ ج: لسة بيدرسوا.
س: وما هي ممتلكات والدك؟ ج: معرفش.
س: هل والدك ميسور الحال؟ ج: أيوة.. هو ميسور الحال وغني.
س: وأين تحديدا مارستِ حياتك؟ ج: أنا كنت عايشة مع أهلي وبعدها عشنا فترة في الإسكندرية، وبعد الانفصال نقلت مع ماما إلى القاهرة، وفي أواخر 2018، سبت ماما وعشت لوحدي في حدائق أكتوبر.
س: وما سبب تركك لأسرتك والعيش لوحدك؟ ج: عشان المفروض إننا هنعيش هنا في القاهرة وأنا حاليا بدور على شقة نعيش فيها كلنا.
س : وما هي مؤهلاتك العلمية؟ ج : أنا كنت ثانوية عامة نظام أمريكان وبعدين حولت على عربي وتأخرت سنتين، وبعدين دخلت خدمة اجتماعية حلوان، ومدخلتش امتحانات من سنتين.
س: وإلى أي اتجاه توجهتِ عقب الانقطاع عن الدراسة؟ ج : كنت بحاول اشتغل فى ابليكشن اسمه “بيجو لايف”.
س: وما هو هذا التطبيق؟ ج: برنامج بفتح منه لايف وكلمني واحد مش فاكرة بياناته وهو قالي إني مطلوب مني أفتح 30 ساعة في 10 أيام، وببعت البيانات للوكيلة اللي اسمها فطيمة، وبديها الحساب بتاعي وهي تدخلني في الشركة، ولما المتابعين يزيدوا باخد فلوس، وكل مالفيديو إضاءته كويسة واللايف مش بيقطع أتقبل في الشركة.
س: ما هي ممتلكاتك ومصادر دخلك؟
ج : أنا معنديش ممتلكات خاصة بيا ومصادر دخلي هي تحويلات من ويسترن يونيون من واحد دكتور مصري في السعودية اسمه عماد عبد الرحمن الخطيب.
س: وما صلتك بهذا الشخص وما هي بياناته بالكامل؟
ج : هو كان بعتلى قبل كدا على أكونت بيجو لايف قديم ليا بس مش فاكرة اسمه ولا الباسوورد الخاص بيه علشان مفتحتهوش من زمان وعملت أكونت جديد اللي قولت عليه ومعرفش أي حاجة غير اسمه.
س: وما هي ظروف نشأة علاقتك بسالف الذكر؟
ج: هو كان قالي لما كلمني إنتي إزاي داخلة على البرنامج ده وكل اللي شغالين عليه مش شبهك وأنا رديت عليه بحاول أساعد نفسي وأجيب فلوس وبدأنا نتكلم مكالمات عادية وعرف عني تفاصيل حياتي وبدأ يبعتلي فلوس وبقت الفلوس دي مصدر دخلي.
س: وما عدد المرات التي قام فيها سالف الذكر بإرسال مبالغ مالية لكِ؟
ج: حوالي 18 مرة.
س: وما قيمة المبالغ في كل مرة؟
ج: كانت بتختلف كل مرة بتبقى مبلغ معين مرة 600 دولار ومرة 1000 دولار ومرة 1200 دولار.
س: وهل من الطبيعي إرسال شخص مبالغ دون مقابل؟
ج: آه.
س: وما تعليقك على ذلك؟
ج: هو كان بيبعتلي الفلوس دي علشان بيساعدني.
س: وهل ما زلتِ محتفظة بتلك المبالغ؟
ج: لا صرفتها عملت عملية نحت بـ 60 ألف جنيه من حوالي سنة فى المستشفى التخصصي بالرحاب وعملهالي دكتور اسمه محمد عبد الوهاب، واشتريت 3 تلفونات، وكنت بصرف على حاجات تاني زي تلاجة وعفش للشقة وتلفزيون، وكنت بأجر عربيات عشان أوبر بياخد من فلوس كتير.
س: وما أوجه استخدامك لشبكة الإنترنت؟ ج: بدأت عليه من سنتين وعملت أكاونت على تيك توك، وعلى الحساب القديم كان يتابعني 700 ألف شخص، والجديد حوالي 30 ألف وبيتابعني على انستجرام حوالي 200 ألف شخص، وبيتابعني على يوتيوب 12 ألف شخص، ومش عارفة كم على سناب شات.
س: وما سبب إنشاء كل هذه الحسابات؟ ج : عشان أبقى متواجدة على كل الأبليكشنز.
س: وما المحتوى الذي تقومين بنشره؟ ج: فيديوهات عادية بحرك فيها شفايفي على الأغاني، وفيه فيديوهات رقص كنت بنزلها عشان أجيب متابعين كتير وإعلانات.
س: وما سبب سعيك وراء الكسب المادي رغم أن والدك ميسور الحال؟ ج: عايزة أكبر نفسي بنفسي.
س: وأين تقومين بتصوير هذه المقاطع؟ ج : في البيت أو الشارع أو الساحل لما كنت هناك.
س: وما سبب نشر هذه الصور والمقاطع؟ ج: بحب أنشر حياتي اليومية.
س: وما سبب ضخامة عدد المتابعين لكِ؟ ج: عشان الفيديوهات اللي بعملها على الأغاني أخدت شهرة ونسبة مشاهدات عالية؟
س: وما سبب شهرة هذه المقاطع؟ ج : عشان الفيديوهات اللي بحرك فيها شفايفي وبرقص فيها على أغاني مشهورة.
س: وما قولك فيما قرره ضابط بمحضر التحريات، أنكِ نشرتِ صورا ومقاطع خادشة للحياء عبر حساباتك؟ ج: دي حرية شخصية وأنا مش بقول لحد اعمل زيي وبعدين أنا مسحتهم بعد ما نزلتهم بس كانوا انتشروا.
س: وما سبب حذفك لهذه المنشورات؟ ج: ندمت عليهم لأن دي مش شخصيتي.
س: وما قولك فيما أضافه الضابط برصد مقطع إباحي لكِ على مواقع جنسية عالمية؟ ج: مش بتاعي.
س: وما قولك فيما سطّره الضابط حول وجود علاقة غير شرعية بينك وبين شخص من جنسية عربية؟ ج: محصلش.
س: هل من خلافات مع الضابط وما تعليقك إذا لما سطّره وشهد به؟ ج: معرفهوش ومعرفش ليه قال الكلام دا.
س: ومن أين تحصلتِ على المبلغ المالي الذي تم إيداعه في حسابك والمبالغ المالية التي مكنتك من استئجار سيارتين؟ ج: من الفلوس اللى كان يبعتهالي الدكتور من السعودية.
س: وهل جميع تلك المبالغ نظير مساعدته لكِ فقط؟ ج: آه وكمان كان هيخطبني لابنه مصطفى اللي عايش هنا في مصر.
التقرير الفني يكشف علاقة هدير الهادي فتاة “تيك توك” بالشيخ عبد الله والأموال المرسلة من الكويت (مستندات)
س: وهل تقابلتِ مع مصطفى؟ ج: أيوه كذا مرة.
س: وما قولك فيما هو ثابت بمحضر مشاهدتنا للحزر الخاص بالإسطوانة المدمجة المعروضة علينا ؟ “تلاه عليها”. ج: فيديوهات حمام السباحة دي بتاعتي بس الإسكرينات بتاعة المواقع الإباحية مش بتاعتي.
س: هل لديكِ سوابق أو تم ضبطك في وقائع مماثلة؟ ج: لا.
س: وما قولك فيما ثبت بقيامك ببث حالة على انستجرام تدعين فيه الفتيات للاشتراك في تطبيق بيجو لايف؟ ج: فاطيمة الوكيلة بتاعتي طلبت مني دا.
س: وما سبب ذلك؟ ج: عشان تشغل الناس في الوكالة بتاعتها.
س: وما قولك فيما ثبت بمحضر فحص هاتفك من إرسالك تسجيلات صوتية لفتيات لشرح خصائص برنامج “بيجو لايف” ؟ ج: أنا فعلا بعت الرسايل دى عشان يشتغلوا في “بيجو لايف”.
س: أنتِ متهمة بارتكاب جريمة الإتجار بالبشر بأن استخدمت فتيات بواسطة استغلال حاجتهن للمال بقصد الاستغلال الجنسي؟ ج: محصلش.
س: أنتِ متهمة بنشر بقصد العرض صورا لكي ومقاطع مرئية خادشة للحياء العام على حساباتك بمواقع التواصل الاجتماعي؟ ج: محصلش
س: أنتي متهمة بفعل علانية أفعالا فاضحة مخلة بالحياء العام بأن نشرتِ صورا ومقاطع مرئية على حساباتك بمواقع التواصل الاجتماعي؟ ج: محصلش.
س: أنتِ متهمة بممارسة الدعارة بمقابل؟ ج: محصلش ومليش فيها.
س: أنتِ متهمة بالإعلان عن طريق حساباتك الشخصية بشبكة المعلومات صور ومقاطع مرئية تتضمن الدعوة إلى لفت الأنظار للدعارة؟ ج: محصلش.
س: أنتِ متهمة بالاعتداء على القيم والمبادئ الأسرية في المجتمع المصري؟ ج: محصلش.
س: هل لديكِ أقوال أخرى. ج: لا.
