"مبغلطش في حد ودي تربيتي".. عزيز الشافعي يُكذِّب رامي صبري (فيديو)
كشف الشاعر والملحن عزيز الشافعي حقيقة الخلاف بينه وبين رامي صبري، من خلال بث مباشر عبر صفحته الرسمية على "فيس بوك".
وبدأ "الشافعي" اللايف بغنائه "حياتي مش تمام"، الأغنية التي قام بتأليفها وتلحينها لـ"رامي صبري" العام الماضي، ثم سرد بداية أزمته مع رامي قائلًا: "أولًا أغنية زي مانتي، عملتها سنة 2019، وده نفس يوم اللي عملت حياتي مش تمام، بعت الأغنيتين للفنان عمرو دياب، لأني كنت عامل ساعتها يوم تلات، وحابب أعمل حاجة مختلفة معاه، لكن الهضبة مردش في نفس الوقت".
وأضاف "عزيز": "جالي تاني يوم رامي صبري، قلتله أنا بعتها لعمرو دياب، عجبته الأغاني، بعد ما روح بعتلي قالي هاخد حياتي مش تمام، لان زي مانتي مش لايقة عليا ومش حاسسها، وبعدها عمرو عجبته زي مانتي، وكلمت ساعتها صديقنا المشترك محمد حامد قلتله قول لرامي أن عمرو دياب أخد زي مانتي".
واستطرد قائلًا: "رامي صبري جالي تاني يوم وباركي على اغنية عمرو دياب وخدني بالحضن، وقال ماتقربش من أغنية حياتي مش تمام، وبدأ يشتغل عليها مع الموزع جلال الحمداوي، وبالرغم إنه عمل حاجة في التوزيع مكنتش موافق عليها لكن وقلت عادي، فا دي قصة زي منتي خلصت ومفيهاش كلام".
وتابع بالأزمة الثانية وهي أغنية شكرًا قائلًا: "أغنية شكرا موضوعها أسهل، لأني معايا فيها شريكي تامر حسين، عشان اللجان لما بتبعتلي إنك بعت صاحبك عشان الفلوس، اسألو أصدقائنا الموهوبين اللي اشتغلت معاهم بعمل ايه في الفلوس، واسألو صديقنا المشترك محمد حامد، وإحنا في بيزنس الموسيقى الإنتاج فيه واقع من سابع دور، والواحد بيطلع جدع وبيتهزق في الاخر".
وأضاف: "أغنية شكرًا اتعملت قبل الاتنين التانيين وكان اسمها فرصة واحدة، وكان كلماتها، قدامك فرصة واحدة، هتعيشي معايا مرة، عايشين على أرض واحدة، كوكب وسط المجرة، جمعتنا الدنيا صدفة، بين ملايين اتقابلنا، وانا عارف وانتي عارفة اللى محدش عارفه غيرنا، قدامك فرصة واحدة هتعيشى معايا مرة، عايشين ع ارض واحدة، كوكب وسط المجرة.. واتعملت في يوم 12 أغسطس 2019 ".
واستكمل: "عجب رامي اللحن ومعجبوش الكلام، فقالي ينفع نكتب الكلام مع تامر حسين، فقلتله ياريت ويزيدني شرف، وتامر عمل كذا اوبشن وماوصلش لحاجة مع رامي بالرغم إنهم كانوا عاملين سوا أغنية خطيرة، وعمل معايا أغنية حياتي مش تمام وغريب الحب ومش مرتاحين".
وأضاف: "تامر حسين وصل لشكل نهائي لأغنية -شكرا كده للي سابنا- فا مش معقول كل مطرب هيسمع عندي اغنية بدون تنازل أو تفاوض على فلوس واسيبها له ده مش منطقي، وأنا مبغلطش في حد، لأن دي تربيتي وأنا راجل واخدها من تحت وأعرف الأصول والجدعنة وبعرف آخد حقي، وأنا مش عايز يبقى بيني وبين رامي حاجة شخصية واسألوا محمد حامد صديقنا المشترك".
وتابع "الشافعي": "وانا بعّت قلت مش هتعامل معاك وأنا زعلان لأن إنت راجل جامد بس للأسف شخصيتك مش راكبة مع شخصيتي، إحنا كنا بنتكلم واتساب لحد قبلها بفترة، كان ممكن تبعتلي وتقولي مش هتعامل تاني، والفنان عمرو دياب مالوش أي علاقة بالمشكلة لأنه اسمه اتجاب وبعدها اتشال بس بعد إيه، وإنت يا رامي مش صاحبي أنت صاحب تامر في الأصل، واللجان اللي بتبعتلي ألفاظ أنا وتامر هعتبرها عند ربنا".
