قصة حب جديدة.. نكشف سر حديث “الشرنوبي” عن علاقته بسارة الطباخ (خاص)
شهدت الفترة الماضية، انتشار العديد من الأخبار التي كانت تفيد بحدوث مشاكل بين المنتجة سارة الطباخ والفنان محمد الشرنوبى، ولكن طيلة هذه الفترة كان الشرنوبي يلتزم الصمت، ولم يصرح بأي شيئ عن وجود خلافات بينه وبين سارة الطباخ.
ولكنه قرر أمس الخروج عن صمته لوسائل الإعلام، والإعلان عن كافة المشاكل بينه وبين سارة الطباخ، وكشف القصة كاملة لكل الناس.
وأوضح مصدر مقرب من الشرنوبي في تصريح خاص لـ”القاهرة 24″، أن السبب في كشف كل هذه التفاصيل عن علاقته بسارة الطباخ، هو قصة حب جديدة يعيشها خلال الفترة الحالية مع فنانة سيتم الكشف عن اسمها خلال الفترة المقبلة، ولكنه يتحفظ على ذكر اسمها حتى يتم الإعلان عن ارتباطه بها بشكل رسمي خلال الأيام المقبلة، خوفا من تعرضها لأي حملة تشوية أو ما يشبة ذلك.
ولهذا السبب كان الشرنوبي حريص في البيان الذي أصدرة صباح أمس للصحافة، أن يقوم بالتركيز على فرق السن بينه وبين سارة الطباخ 15 سنة، في محاولة منه لكسب تعاطف الرأي العام معه، خاصة أن الفترة الماضية شهدت هجوم شديد على الشرنوبي من قبل العديد من الصحف والمواقع الإلكترونية.
وقال محمد الشرنوبي في بيان رسمي صدر عنه صباح أمس، ونشره عبر صفحته الشخصية على فيسبوك: “انا طول عمري بحب شغلي جداً ومبحبش اتكلم في اي حاجة تانية غيره، بس بقالي فترة عليا هجوم شخصي غير مبرر وكلام كتير له علاقة بحياتي الشخصية ماحبتش اتكلم فيها غير لما اكون جربت كل الطرق في اني احاول احلها الاول”.
توتر علاقة محمد الشرنوبي بسارة الطباخ.. ونكشف سر الهجوم عليه (خاص)
مضيفًا: “في سبتمبر 2017 بعد مسلسل لا تطفئ الشمس وحلقات صاحبة السعادة وحفلة الموسيقار الكبير عمر خيرت واغنية “مين فينا” مع النجمة الكبيرة اصالة وبعد ما كنت لسة ماضي مسلسل كأنه امبارح وفيلم الممر، جالي شغل مع شركة كبيرة عشان انزلّهم بوست على انستجرام عندي، اللي كانت ماسكة الحملة دي واحدة اسمها سارة الطباخ .. نشأت علاقة صداقة لطيفة وكانت بتقنعني اني احترف الغناء .. في فترة كنت عايز اركز في التمثيل أكثر”.
من هي سارة الطباخ خطيبة محمد الشرنوبي؟ (صور)
واضاف الشرنوبي: “سارة كانت انسانة جميلة وجدعة جداً.. الموضوع بعد كدة اتطور من صداقة لعلاقة حب وبقى فيه ما بينا ثقة و احترام بس دي كانت بداية مشاكل قوية جداً حصلتلي في حياتي أهمها عدم رضا ابويا عن العلاقة دي بسبب ان فرق السن بيني وبينها ١٥ سنة وده كان السبب الرئيسي ان ابويا مكانش موجود في فيديو قراية الفاتحة اللي معظم الناس شافته”.
“لفت نظري ولد وسيم”.. سارة الطباخ تروي كيف تعرفت على محمد الشرنوبي (فيديو)
مشيرًا إلى أن الفيديو الذي تم تصويره يعود تاريخه إلى يوم ٥ ابريل ٢٠١٨ قائلًا: “يعني من سنة و٣ شهور تقريباً وفضل ابويا زعلان مني فترة و ماتصالحناش غير لما حضر لي اول حفلة اعملها في حياتي وده كان السبب في أن لما قدمته عيطت ونزلت من عالمسرح. المهم، نرجع للي كنت بقوله .. قبل مايبقى فيه خطوبة او حتى اي شغل مابينا كان عندي اكتر من عرض من شركات إنتاج اغاني كبيره اني اعمل البوم بس كنت حابب اعمل كل فترة اغنية جنب التمثيل .. فضلت سارة تقنعني كتير اننا نشتغل مع بعض ونعمل البوم انا وهي والقرار دة كان مخيف جداً بالنسبة لي لأنه كان معناه اني مش هبقى عارف اتفرغ تماماً للتمثيل، وده اللي حصل فعلاً بعد كأنه امبارح”.
واستكمل الشرنوبي كلامه قائلًا: “اقتنعت و ابتدينا نشتغل بعدها فوجئت بيها بتقدملي عقد احتكار مدته ١٠ سنين والشرط الجزائي اللي في العقد ٦٠٠.٠٠٠ دولار وماليش حق إمضاء أي عمل سواء تمثيل او غناء وللأسف دي غلطتي انا كنت متخيل ان شروط العقد دة، الشروط المتعارف عليها، و لما خفت و قلقت من الشروط دي شوية كانت سارة بتقنعني ان دي مجرد شكليات وان كل حاجه هاتتم بالتراضي وقالتلي بالحرف “أي وقت هاتيجي تقولي فيه أن العقد ده مش مريحك هديلك العقد .. عمري ما هغصبك على حاجة و بسبب ثقتي فيها وحبي ليها وافقت على كل ده ووافقت كمان اني امضي العقد ده رغم انه كان معمول بتاريخ قبله بحوالي ١٠ شهور (بتاريخ اليوم اللي قابلتها فيه تقريباً)، ومن بعد ما مضيت العقد و بعد ما قريت الفاتحة اللي وقفت قدام كل الناس فيها، لقيت طريقة تعامل مختلفة تماماً وتوتر بدون اسباب بيحصل بيني وبينها”.
وأكد الشرنوبي:
“فسخت الخطوبة شهر يوليو ٢٠١٨ يعني بعد ٣ شهور بالضبط من قراية الفاتحة وماكناش لسه ساعتها اشتغلنا على الالبوم وقلتلها اني مش حابب اكمل شغل خلينا اصحاب احسن وكان فيه محاولات معايا من ناس كتير مشتركة ما بيننا عشان يصلحوا الموضوع لاكتر من شهر ووافقت اننا ندي لنفسنا فرصة ثانية كتجربة عشان كان عندي مشاكل كتير في طريقة التعامل”.
تعرف على سر منع محمد الشرنوبي الصحفيين من حضور حفله بدار الأوبرا
وأضاف الشرنوبي:
“رجعنا وكانت الحياه كويسة في الاول ورجعنا نشتغل تاني وبعد فتره بدأت المشاكل ترجع تاني وبشكل اسخف وتسببت في مشاكل كبيرة بيني وبين أهلي وأصحابي القريبين وحتى اي حد في الوسط بقى يتجنبني أو يتجنب التعامل معايا لمجرد ان هي اللي ماسكه شغلي عشان طريقتها مكانتش الذ حاجه خالص، و بدأت تحاول تتحكم في كل حياتي وعلاقتي بكل اللي حواليا”.
خطوبة محمد الشرنوبي ومديرة أعماله سارة الطباخ رسميًا (فيديو)
وأضاف الشرنوبي:
“ولما حاولت امشي تاني ابتدا يبقى فيه استخدام لفكرة العقد بشكل واضح والمشاكل بقت شخصية ومهنية ولما مارضتش اكمل في علاقة انا حاسس انها مابقتش مناسبة ليا ولا انا ولا الطرف التاني، ابتدى يبقى اساليب تانية للضغط آخرها كان فيديو الخطوبة اللي نزل واحنا اصلاً مش مع بعض ولاني عمري ماكنت حابب ان حياتي الشخصية تبقى مجال للكلام و لان فعلاً الخطوبة دي حصلت في يوم من الايام ولأني عمري ماهجرحها او احرجها، ماعلقتش خالص على وعد منها اننا ننزل بعد فترة ان الخطوبة اتفسخت لان احنا فعلاً دلوقتي مش مخطوبين، عدم ردي على الڤيديو في الفتره دي خلاني اكتشف انها عاملة مشاكل مع ناس كتير وبقى عندي معلومات وحاجات ماكنتش حابب اني اعرفها عنها، مع ذلك برضه كنت دايماً بسعى اننا نخرج بالمعروف”.
ومن ساعتها بقى فيه شكل اشرس في التعامل لأن هي بس اللي ليها الحق في الإمضاء على العقود وهي مابتردش على اي حد بيطلبني في شغل فا بقى شغلي واقف وحتى فلوسي القديمة مش عارف اخدها منها وفيه حملات غير مبررة وغير منطقية معمولة عليا و فيها تجريح شخصي ليا ولعيلتي ومحاولات لعمل مشاكل بيني وبين الصحفيين اللي عمري ماكان بيني وبينهم مشاكل وبكن لهم كل احترام .. مع العلم ان من اقوى نقاط القوة عندها الميديا والصحافة والعلاقات العامة بحكم شغلها ومع العلم برضه ان شركتها لسه المفروض بتمثلني وبتدير أعمالي.
انا كنت ملتزم الصمت ومش بتكلم في التفاصيل دي كلها عشان كان بيني وبينها عشره وعيش وملح .. بس واضح اني كنت غلطان عشان نيتي كانت سليمه شوية زياده والطرف التاني ماحطش اي اعتبار لكل الحاجات دى.
وأختتم الشرنوبي كلامه قائلًا:
“دي المرة الوحيده اللي هاتكلم فيها عن الموضوع ده ومش ناوي اتكلم فيه تاني ولا على مستوى الصحافه ولا على مستوى السوشيال ميديا. والمرة الاولى وبإذن الله الاخيرة اللي اضطر اتكلم فيها عن حاجة ليها علاقة بحياتي الشخصية، بس كان لازم اشرحلكوا ايه اللي بيحصل عشان كل التساؤلات اللي بتحصل بقالها فتره”.
