أب يصاب بأزمة قلبية.. تداين لدرس ابنته وشاهدها تشرب “شيشة” فى كافية” بالسويس (صورة)
قال كريم عبد المعين، مدير مكتب جريدة الجمهورية بالسويس، إنه شاهد شخص أصيب بأزمة قلبية بعدما رأى ابنته تشرب “الشيشة”، بجانبه في إحدى الكافيهات بمدينة السويس، وذلك بعدما تداين والد الفتاة بمبلغ مالي، لسداد أموال الدروس الخاصة بابنته.
وأوضح عبد المعين خلال تدوينه له على صفحته الشخصية بموقع التواصل الاجتماعي “فيس بوك” قائلًا: “فاكرين ال post المتداول ان ولد كان بياخد فلوس الدروس من والده .. ووالده ضاق بيه الحال وذهب لكافيتريا ليكون مصدر رزق اضافي ليه وفوجئ ان ابنه قاعد ماسك الشيشه ومضيع فلوس ابوه علي الكافيتريات”.
وتابع، “النهارده حصل امامي مشهد أشد قسوه في كافيتريا موجود فيها بمنطقة المحروسه، كنت قاعد وجنبي شله بنات كل واحده فيهم ماسكة ” لاي ” الشيشه وتنفخ فيه زي شعله النصر للبترول من كتر الدخان .. وفي الترابيزه اللي قدامي راجل ومعاه شخص تاني ” سليط اللسان ” قاعد عمال يجيب الراجل يمين وشمال ومن الواضح أنه استلف منه مبلغ لدروس اولاده .. والراجل من انكساره كان قاعد وشه في الارض”.
وأكد الصحفي، “شله البنات صوتهم كان بيعلي كل شويه وضحكهم بقا مسموع وفجأه واحده شتمت زميلتها بهزار يابنت ال …. .. هاتي الموبايل ، مشيرا إلى أن “اللفظ لفت انظار الموجودين .. ونظر الرجل ” المنكسر ” ليكتشف ان البنت اللي اتشتمت وماسكة الشيشه في ايدييها زي المعلمه جمالات.. بنته!!”
واستطرد، “سيطر الصمت علي المكان بمجرد م البنت قالت ” بابا ؟ ” .. في الوقت اللي الراجل وقع اغمي عليه !، نقلنا الراجل لأقرب مستشفي وتبين ان التشخيص المبدئي ازمة قلبيه .. والراجل بين الحياه والموت !”.
وناشد كريم الأبناء في آخر تدوينته قائلًا: “كلمه لكل ولد بنت في هذا الزمن ” الصعب ” .. رفقاً بوالديكم”.
