والدة شاب مصري تروي تفاصيل احتيال أردني يستقطب الشباب بمنحة دراسية لضمهم لجماعات إرهابية (مستندات)

قالت والدة الطالب محمد حسام، إن أردنيًّا يقيم في مصر يدعى “أحمد. س”، يختار الشباب النوابغ والمتفوقين دراسيًّا ويوهمهم بقدرته على إلحاقهم بالجامعات الأوروبية، ويستولي من كل شاب على مبلغ 20 ألف يورو، والبعض يسافر ويجد تلك الأحلام سرابا، وضحاياه مشردون بأوروبا صيدًا سهلًا للجماعات الإرهابية بعد أن أوهمهم بالسفر للدراسة بالجامعات الأوروبية، كأنها خطة ممنهجة من عصابة دولية، بهدف تدمير مستقبل هذا الوطن من خلال ضياع شبابه المتفوقين علميًّا.

وتروي الوالدة خلال حديثها لـ”القاهرة 24”: “ابني أثناء دراسة الثانوية العامة كانت أمنية حياته يسافر يكمل دراسته في ألمانيا وإحنا كأسرة عايزين مستقبل ابننا ويفيد نفسه وينفع بلده، عرفنا عن طريق مواقع التواصل شركة بتسفر للخارج روحنا اتصلنا بيهت وادانا معاد في المركز الثقافي الكندي، وأوهمنا بأنه المندوب التعليمي للسفارة داخل مصر”.

بلاغ يتهم عصابة أردنية باستخدام شباب مصري في الانضمام للإرهاب

وتابعت: “فعلا روحنا أنا وابني واتفقنا وعرفنا كل الشروط وكتبنا عقد اتفقنا إن ابني أول ما يوصل ألمانيا هيلاقي حد مستنيه في المطار، هيلاقي سكن كويس على حسابنا الخاص لكن الدراسة في الجامعة مجانية، زي ما مكتوب في العقد بس كانت من ضمن الشروط دي إني أروح أعمل لابني حساب بنكي مخصص بقيمة 10 ألف يورو لضمان إن ابني مينزلش يتسول في دولة ألمانيا، وجمعنا الفلوس من قوت يومنا علشان إحنا أسرة بسيطة وبعنا حاجات من الجهاز بتاعي علشان أقدر أجمع الفلوس، روحنا عملنا حساب فعلا لابني مغلق فقالوا إن الحساب المغلق لازم يكون ليه كفيل في ألمانيا”.

وتابعت: “قالوا إن الحساب المغلق ده لازم يكون ليه كفيل هناك في دوله ألمانيا فخلاص تمام بعتلنا اسم شركة هناك هيكون فيه وكيل لنا هناك عملنا فعلا التحويل البنكي، وابني سافر وكل حاجة اتقفنا عليها محصلتش ولا حد قابله في المطار ولا سكن ولا أي حاجة وكنا في بداية شهر رمضان ابني اتبهدل ونام في الشارع وفي المساجد، فضل في الوضع ده كتير لحد ما لقي ناس ساعدته وراح سكن فبدأنا نسال إمتى الحساب البنكي هيتفعل ابني محتاج فلوس، لكن تهرب مني وقفل تلفونه ومش عارفة أوصله”.

وتابعت: “ابني هناك دلوقتي مش بيعمل أي حاجة وكل ما نكلم أحمد ده كلامه معانا اخبطوا راسكم في الحيط، مالكمش فلوس عندي وأنا مش هعمل حاجه ولا هرد عليكم، ابني دلوقتي فيه جامعات إرهابية حاولت تتواصل معاه، ابني متربي وعمره ما يعمل حاجة غلط لكن هناك مغريات كتير وهو حالته المادية والنفسية سيئة أنا بستنجد بالرئيس السيسي ووزير الداخلية ووزير العدل ابني مش عارف يرجع ولا عارف يكمل تعليمه”.