< "ولاد ناس"
القاهرة 24
رئيس التحرير
محمود المملوك

"ولاد ناس"

سكت شوية وبعدين انفجر في العياط وقال: "كان لازم أبويا يعرف إني مش بحتاج بس للفلوس علشان أبقى كويس، لكن كمان كان نفسي أحس بالحب منه".

افتكرت الجلسة دي وكل تفاصيلها، وأنا قاعد بتفرج على حلقة من مسلسل "ولاد ناس" اللي بيتذاع في الموسم الرمضاني الحالي، وحسيت إني شوفت أبو الولد ده في "صبري فواز" الفواز دايمًا في الرهان إنه عبقري وبيعرف يتلون مع الدور ويحسسك إنه هو أصلًا كدا مش بيمثله.

وشوفت الحب اللي الولد ده بيتمناه في حب "أحمد وفيق" لابنه في المسلسل، وبعتبر دوره يعد من أعظم الدورات التدريبية اللي ممكن أي حد داخل على جواز أو خلفة إنه يتعلمها علشان يعرف إيه المطلوب منه في اللي جاي، علشان يعرف إزاي يقدر يكون أب فعلاً وحقيقي، مش مجرد ماكينة ATM.

الفلوس مهمة علشان احتياجات ولادنا المادية، لكن الحب والاهتمام مهمين علشان يطلعوا أسوياء نفسيًّا، يطلعوا شخصيات قادرة تكمل وتواجه رغم مصاعب ممكن يقابلوها في حياتهم بعد كدا سواء في صحتهم، أو دراستهم، أو مستقبلهم، أو حتى في علاقاتهم بالناس من حواليهم.

أفتكر إن والدي، وقت عملية رجلي التانية، وقتها الدكتور كان قايل لي علشان تقوم تلعب شوية، هنفك الجهاز من رجلك بعدين نبقى نركبه بعد فترة في رجلك التانية، لكن مجرد ما فوقت من البنج، لقيت رجلي التانية تقيلة، ففهمت وقتها إنه ركب الجهاز على طول مستناش.

وقتها لقيت بابا هو اللي حضني وقعد يهديني ويفهمني إنه لمصلحتي، وإن ده كان أنسب قرار وأن ده الصح لحالتي وقتها، وفعلًا هو اللي عرف يقنعني ويهديني مش الدكتور اللي عمل العملية.

وفي كل خطوة بمشيها في الحياة، بلاقي دايمًا ضهره في ضهري علشان مخافش وأكمل وأدخل على المرحلة اللي بعديها من غير خوف وأنا مطمن أن ضهري متغطي بيه وأنه معايا.

منكرش إن الفلوس يمكن ليها لازمة في حاجات كتير ولادنا بيحتاجوها، ويمكن على أساسها بتتكون أحلام جواهم وعلى أساسها بيحلموا بحاجات ليها علاقة بمستقبلهم، لكن المهم تسأل نفسك، إنت قبل ما تديله الفلوس، هل اديته الحب اللي يخليه يستغل الفلوس صح؟

هل خليته شخص سوي نفسياً ومدرك لقيمة الحياة والمشاعر قبل ما يكون مدرك لقيمة الأرقام وأوراق البنكنوت ولا لا؟، لأن وقت ما يكون مدرك لقيمة الأوراق ومش مدرك للمشاعر، يمكن الفلوس تبسطه، لكن انبساط في الطريق الغلط، مش الطريق اللي أي أب يتمناه ويشوفه ابنه فيه.

شكراً لمسلسل "ولاد ناس" كشفت حقايق كتير وعريت حقايق أكتر تتعلق بالتربية من حوالينا يمكن كنا حاسينها لكن عاملين مش شايفين، وشكرًا صبري فواز على متعة كل سنة بطلتك وشكراً أحمد وفيق، جايز دورك يفرق في حياة أهالي كتير بعدين.