لميس الحديدي عن ضبط بانجو بمدرسة ابتدائي في المنصورة: "مصر بلد العجائب"
علقت الإعلامية لميس الحديدي، على واقعة ضبط زرع مخدر البانجو داخل مدرسة بلجاي الابتدائية بمدينة المنصورة.
وقالت "الحديدي"، خلال تقديمها برنامج "كلمة أخيرة"، المذاع على فضائية "on"، مساء الإثنين: "مش كفاية كورونا الصراحة مصر أم العجائب.. لقوا في مدرسة بلجاي فى مدرسة ابتدائية مالقوش ورد ولا توت ولا فل ولا ياسمين زي ماكانوا بيزرعوا في مدارسنا زمان، لقيوا ايه بانجو ونيابة المنصورة تحفظت على مشرف المكتبة ومشرف الوسائل التعليمية بعد قيام أحد العمال بالإبلاغ عنهم، ونعم الثقافة والله والتعليم".
وتابعت: "زرعوا بانجو وسط الريحان المزروع اللي بيعلموا بيه الأطفال الزراعة، العامل شك قال ده مش ريحان ده بانجو مدير المدرسة حررت محضرًا فى الإدارة التعليمية وفى النهاية اللي طالع مشرف المكتبة، وأنا مابقلش أن دي حالة تعمم في التعليم، لكنها حالة فردية غريبة مذهلة ومبهرة، يا ترى بيزرعوه عشان مين؟".
وأضافت: "أنا متخيلة مشرف المكتبة والعيال داخلة تاخد الكتب وهو مسطول، يا ترى كان بيديهم كتب إيه، أو بيعلمهم إيه، ويا ترى مشرف الوسائل التعليمية كان بيقلهم وسائل ايه؟، كيف تحشش كيف تشرب البانجو ما الفرق بين الحشيش والبانجو؟، فعلصا موضوع مضحك ومحزن، وبنشكر العامل اللي كشف الواقعة وقام بالإبلاغ عن مشرف المكتبة".