عند الحديث عن المواقف المحرجة التي تتعرض لها الفتيات، تتجه الأنظار إلى "الدورة الشهرية" فهي أحد الأسباب الشائعة وراء التعرض لمواقف الإحراج، وتحدث "القاهرة 24" مع مجموعة من الفتيات، للتعرف على أكثر المواقف المحرجة التي تعرضن لها بسبب "البريود".

فقالت منال: "أكتر موقف محرج حصل معايا، لما كنت بتدرب كاراتيه، والبريود جت، بس أنا محستش بيها، ولقيت الكابتن أخد باله، وقالي أنتِ تعبانة، روحي دلوقتي وكفاية كدة، ساعتها اتحرجت جدًا منه".

وروت أخرى الموقف الذي تعرضت له، فقالت: "كانت البريود عندي، ومرات أخويا كانت واضعة، فجدتي قالت لأمي مينفعش تدخل على واحدة  والدة وهي عليها الدورة، عشان كانت معتقدة إن ده بيقلل لبن الأم، فأنا قعدت أعيط، وأخويا ووالدي سمعوا عياطي، فسألوا في إيه، وعرفوا، وساعتها عيطت أكتر مش عشان أروح أزورها، بل لأني اتفضحت قدامهم".

بينما كشفت م.أ  الموقف المحرج الذي تعرضت له مع الدورة الشهرية قائلة: "أول مرة تيجي لي في حياتي، الدم طبع في الملابس، وقعدت أعيط وأقول لأمي، إيه ده، وبابا اتحرج جدًا ومشي، بس أنا مكنتش فاهمة حاجة".

أستاذ نساء: خفض الوزن ينظم الدورة الشهرية بنسبة 20% 

فيما تقول مي محمود، اسم مستعار إنه في أحد أيام شهر رمضان، كانت الدورة الشهرية عليها، وكانت تخطط للخروج مع والدها في نهار رمضان، وتفاجئت به قبل الخروج، يقول لها: "كلي قبل ما ننزل، أنا عارف إنك فاطرة".

وتحدثت فتاة عن حكايتها مع مواقف البريود المحرجة، فقالت: "كنت لابسة بنطلون أبيض، وكنت في امتحان وجتلي، وفضلت طول الوقت أفكر هاعمل إيه، ومعرفتش أحل، وأول ما سمعت الدكتور بيقول نص الوقت خلص، سلمت الورقة وجريت".

بينما تعجبت أخرى قائلة: "لما البريود بتيجي لي، خاصة في رمضان، البيت كله بيبقى عارف، وبينادوني أدوق الأكل".

كما قالت م.أ: "مرة في الشغل كنت لابسة بنطلون فاتح، وفجأة حسيت بشعور غريب، فسألت زميلتي، في حاجة في اللبس، قالتلي اللبس بايظ خالص، قعدت أفكر أعمل إيه، ومن رحمة ربنا كنت لابسة شمير طويل، فقلعته وربطته على وسطي، وحسيت إن المكان كله بيقول هي بتعمل إيه، وبعدين دخلت الحمام نص ساعة غسلت اللبس، وفضلت قاعدة مكاني طول اليوم لحد ما اللبس نشف".

وعن أسوأ موقف مرت به مع البريود، تقول ميادة: "أنا بطبيعتي بتحرج جدا، وفي أول مرة بعد الجواز، جاتلي بتعب، وكنت محروجة أقول لحماتي، وفي نفس الوقت حسيت بتعب رهيب، فمكنتش عارفة أعمل إيه".

وصفات منزلية لتخفيف آلام الدورة الشهرية

كما قالت هند محمد، اسم مستعار: "مرة كنت بتكلم مع جوز أختي، وكنت لابسة فاتح، وعمالة أقوم واتحرك قدامه، وهو بيوطي في الأرض،  وبعد ما دخلت الحمام، لقيت اللبس متبهدل خالص وناشف، فعرفت إنها من بدري كدة، وهو واخد باله واتحرج، ساعتها معرفتش أبص في وشه من الإحراج".

ونقلت ندا محمود، اسم مستعار، قصتها المؤلمة مع البريود، فقالت: "كنت في الثانوي، وكان عندي 3 دروس وراء بعض، وأنا رايحة آخر درس، لقيت شوية شباب واقفين ويشاوروا عليا ويتكلموا، فافتكرهم بيعاكسوا ومشيت، وأول ما وصلت الدرس، صاحبتي قالتلي لبسك متبهدل كدة ليه، وإزاي مش واخدة بالك كل ده، وعرفت ليه الشباب كانوا بيبصوا عليا ليه، فقعدت أعيط، وكل ما أفتكر الموقف ده بزعل".