رئيس التحرير
محمود المملوك

حفلة "تي دانس".. أحد متهمي الفيرمونت: "سمعنا موضوع الاغتصاب من السوشيال"

حفلات خاصة
حفلات خاصة

كشفت التحقيقات طبيعة السهرات والحفلات الخاصة لمتهمي الفيرمونت، والمتهمين بمواقعة "ياسمين. ح" بغير رضاها، بعد أن دسوا لها مخدرًا في شرابها قاصدين بذلك إعدام إرادتها والتعدي عليها جنسيًا.

وأوضح أحد المتهمين في مواقعة فتاة داخل فيلا خاصة بمنطقة مراسي بالساحل الشمالي، بأنهم أقاموا حفلات "تي دانس" بمجموعة من الفنادق منها “فيرمونت”، 

وناقشت جهات التحقيق المتهمين في القضية “أمير زايد، شريف الكومي، ويوسف قرة”.

ويواصل "القاهرة 24" نشر نص التحقيقات في القضية رقم 570 لسنة 2021 كلي شرق القاهرة، بمواقعة فنانة بفيلا خاصة بمنطقة مراسي الساحل الشمال.

وشرعت جهات التحقيقات في سؤال المتهم أمير زايد وجاءت أقواله كالتالي:-

س: ما تاريخ تعرفك على المجموعة؟

ج: الشركة بتاعتي ادتني إجازة لحد ما المشكلة بتاعة الفيرمونت تتحل وأنا متعود أسافر أمريكا كل سنة، من 3 أسابيع إلى 3 شهور ما عدا سنة 2018 و2019 سافرت أماكن تانية، وأنا في المطار كان عندي ميعاد طائرة الساعة التاسعة ونصف الصبح يوم 28 أغسطس، اتمسكت وفضلوا متحفظين عليا في المطار لحد ما عرضوني بالليل على النيابة.

س: من منظم تلك الحفلات؟

ج: أحمد الجنزوري.

س: وما توقيتات حضورك لهذه الحفلة؟

ج: هي حفلات "تي دانس" كانت دائما يوم الجمعة وساعات بتتعمل في "لاب دون كايرو" و"الكلوب هاوس" وكانت بتبقى الصبح وساعات لما كانت بتتعمل في الفيرمونت والروف بتتعمل بالليل.

س: وما هي طبيعة هذا النوع من الحفلات؟

ج: هي حفلة كانت بتبقى مزيكا ورقص وخمرا.

س: ومن هم جمهور هذا النوع من الحفلات؟

ج: هما ناس زينا في الوسط بتاعنا، من سن 21 سنة وممكن 20 سنة لحد سن 30 سنة وممكن تلقي 40 سنة.

س: ما هي شروط دخول الحفلة؟

ج: ساعات كنت بجيب التيكت من مكتب الجنزوري أو حد يجبهالي وساعات كنت بدفع على الباب.

س: ما هي شروط قبول الحجز؟

ج: أنا معرفش هو كان جنزوري بيكون واقف ساعات ويقبل اللي يدخله أو ميقبلوش.

س: وكم سعر هذه التذكرة تحديدًا؟

ج: مش عارف.

س: ما هي المشروبات التي تقدم في هذه الحفلات؟

ج: كل أنواع المشروبات كحولية وغيرها.

س: كم عدد أفراد تلك الحفلة؟

ج: العدد غير معروف. 

س: ما صلتك بالمقطع المصور المعروض عليك الآن؟

ج: أنا مش عارف أقول مين اللى في الفيديو لأن الصورة مش واضحة. 

س: ما قولك في إجماع شهود الواقعة حينما عرضنا الفيديو عليهم بأنك هذا الشخص؟.

ج: معرفش. 

س: ما قولك فيما شهدته المجني عليها في هذا المقطع أن ما فعل لها في هذا الفيديو بدون إرادتها؟

ج: الكلام ده مش صحيح.

س: أنت متهم بمواقعة أنثى بغير رضاها. 

ج: محصلش.

س: ما هي ظروف إلقاء القبض عليك وعرضك علينا الآن وصلتك بالقضية محل التحقيق؟

ج: أنا اللي أعرفه عن الموضوع ده إنى كنت اتعرفت على عمرو فارس الكومي من جولدن جيم في صلاح سالم علشان هو ساكن جنبي في مساكن شيراتون، وده تقريبًا في أواخر سنة 2012 وأول سنة 2013 وبقينا أصحاب أنا وهو ومجموعته تقريبًا لحد 2015 وفي الفترة دي كنا بنخرج على طول مع بعض ونروح حفلات "تي دانس" وكانت حياتنا فيها حرية جامدة  وأنا افتكر 3 مرات شاركت في أحداث جنس جماعي، المرة الأولى والثانية كانوا في بيت عمرو فارس وفاكر البنت مكانتشي مصرية، كان معايا اتنين عمرو وقرة وواحد تاني مرة تانية بس اللي فاكره إن البنت مكنتش مصرية، والمرة الثالثة كانت في الساحل، وكان معايا يوسف قرة ومش فاكر البنت كانت مين، وفي المرات دي كلها كان الموضوع بمزاج البنات أكيد، وأنا روحت حفلة "تي دانس" اللي اتكلموا عليها على السوشيال ميديا وكان معايا واحدة صاحبتي وبعد ما دخلنا الحفلة كان فيه حفلة "افتر بارتي" في فيرمونت نيل سيتي.

س: ما قولك فيما هو منسوب إليك أنك بالاشتراك مع آخرين واقعتم فتاة بأن وضعتم لها مادة تفقد الوعي، واتصلتم بها جنسيًّا على النحو المبين بالتحقيقات؟

ج: محصلش.

س: كما أنك متهم بانتهاك حرمة الحياة الخاصة للمجني عليها بأن التقطت مقطع فيديو مصور في مكان خاص بالساحل الشمالي، حال مواقعتها دون رضاها على النحو المبين بالتحقيقات.

ج: محصلش.