فتاة "واقعة العباءة" تكشف أسباب التقدم ببلاغ ضد صاحب كافيه التجمع الخامس (خاص)
قالت نور سعد، الفتاة التي تعرضت للطرد من كافيه التجمع الخامس بسبب ارتدائها عباءة، إنها قدمت بلاغًا لوزارة السياحة اليوم الأربعاء، ردًا على تصريحات مدير الكافيه الذي اتهمها وأصدقاءها بالتهرب من دفع الحساب.
وأضافت في تصريحات خاصة لـ"القاهرة 24": "قدمت البلاغ، عشان أوضح الحقيقة للناس، بعد ما اتهمنا مدير الكافيه بالتهرب من الحساب، وبعدما فقدت الأمل في الحصول على اعتذار من المكان".
وتابعت "نور": "رغم تقديمي البلاغ، فإني لا أرغب في غلق المكان وقطع رزق الموظفين به".
كما كتبت نور عبر حسابها على موقع التواصل الاجتماعي "فيس بوك" منذ قليل: "مكنتش عايزة أقطع رزق أي حد، عشان كده مشتكش وقتها، وكل اللي كنت عايزاه اعتذار واضح وصريح وبسيط، وإن ده ميتكررش مع غيري".
وأردفت: “لقيت أكاونتس بتبعتلي عاوزين رقم تليفونك، وصاحب الكافيه هيعتذر لك في التليفون، وهيراضيكي وحقك علينا، قولتلهم أنا مش عاوزه غير اعتذار على صفحة الكافية، مش عاوزاه على تليفونات ولا حسابات شخصية، قالولي حاضر.. التزمت الصمت، احتراما لهذا الكلام”.
وأضافت قائلة: "ماحصلش أي حاجة تدل إن فيه اعتذار هيجيلي، لا بالعكس بدأ يحصل تشويه لنا من صاحب الكافيه، مبقاش قدامي غير إني أكلم وزارة السياحة، وبلغتهم بالشكوى، وقالولي هنرد عليكي".
واستطردت حديثها قائلة: "أكدت عليهم إن الموظفين اللي في المكان كانوا في غاية الاحترام، وإن التعليمات كانت من صاحب المكان مش تصرف منهم، وإن الكاميرات فعلا هتجيبي وأنا داخلة المكان بعد المنع، بس ده كان بناء على طلبي إني هدخل أبلغ أصحابي إني ممنوع أدخل أقعد معاهم، وفعلًا دخلت وطلعنا مع بعض من غير ما أقعد ولا لحظة".
