"دي منطقة ولاد الظباط".. إدارة أحد نوادي أكتوبر ترفض نزول طفل حمام سباحة وتهدده بالحبس (صورة)
رفضت إدارة أحد نوادي الشرطة، نزول طفل حمام السباحة الخاص بأولاد الضباط، مما أثار غضب والده، ما أدى إلى مشادة كلامية عنيفة بينهم.
كتب الفنان أحمد الشيخ، عبر حسابه الخاص بموقع التواصل الاجتماعي “فيس بوك”:"من سنة اكتشفت إن فيه حاجة مش طبيعية في عظم رجل موسي ابني.. تقبلت الأمر بحمد الله أولاً، ثم بدأنا علاجا طبيعيا والأمر بإذن الله يتحسن بلطف الله عز وجل".
وأضاف: "قررنا أنا وأمه إننا نشركه في تدريبات سباحة عشان يكمل العلاج الطبيعي، دورنا على مكان قريب مننا، ويكون مناسب لإمكانياتنا المادية، وبالفعل لقينا نادي الشرطة بحدائق أكتوبر مناسب لظروفنا، اشتركنا وبدأنا نحضر مع موسى اللي كان خايف من الميه والكابتن اللي بيدربه، بقيت أقف قريب منه عشان اديله طاقة ثقة واطمئنان، إمبارح روحنا بدري قبل التمرين بنص ساعة، لبسته لبس السباحة وقالي “يابابا انط.. انط يا بابا”، مسكته من ايديه ونزلته للمنطقة الخاصة بالأطفال، كان فيه طفلين، وخارج منطقة الأطفال كان فيه مدرب وبعض الأطفال الأكبر سن من موسي اللي بدأ يتشجع ويحط وشه في الميه ويطلعها ويبص لي وهو فرحان وانا باصقف له واقوله براڨوووو موسي براڨوووو... يالا يا نيمو.. وهو فرحان.. ويكرر الحركة".
وتابع الشيخ: "وفجأة لقيت اتنين داخلين عليا وماسكين أجهزة لا سلكي وطاقتهم بتقول انهم داخلين كبسه علي مجرمين، ابنك؟... مين اللي قالك تنزله؟.. طلعه... اسمه إيه؟؟؟".
واستكمل: "ده ابني، ونزلته عشان طلعه اسمه ايه؟؟؟..موسى.. اطلع يا مو....لوسمحت.. ماتكلموش... أنا هاطلعه، طب يالا... طلعه".
وواصل:"مديت ايدي لموسى، مسكته وطلعته وبدأ يصرخ... ويعيط..لبسته الروب، وحضنته ولفيت لقيت أربع سادين السكة وواحد فيهم نافخ صدره ومربع إيديه وبلهجة كلها صلافة وعجرفة: مين قالك تنزله في المنطقة دي؟؟..قولتله: عادي دي تالت حصة لابني ونزلناه قبل كده.. عشان يستعد للتمرين.. و... قاطعني: دي منطقة ولاد الظباط!!..".
و قال:"حسيت إنه هايبدأ يغير الحوار لسكة مش تمام، سبته ولفيت متجه ناحية الكابتن اللي بيدرب عشان أشهده واستشهد برأيه إن عادي ابني ينزل قبل التمرين زي ماحصل الأيام اللي فاتت لقيته، الشخص اياه..- بينده عليا: خد يا اسطى هنا، لفيتله مستغرب من الأسلوب واللفظ “أسطى” باقوله انت بتكلمني أنا؟، آه بكلمك انت. بطاقتك..انا عايز اروح لمدير النادي.. أنا المدير. خلص. بطاقتك. إنت شغال إيه؟؟؟".
وتابع:" بطاقتي عندكم صورة منها في ملف التقديم... وانا شغال ممثل ومدرب، ومخرج مسرح.... و....بطاقتك ومتكترش في الكلام، بطاقتي مش مكتوب فيها المهنة، فطلعت الموبايل أفرجه علي مشاهد من شغلي... فيلم الخلية ومشاهد مسلسل لعبة نيوتن...باقرب منه الموبايل، زقه من ايدي وقع تحت رجليه... بطااااقتك".
وأضاف: "موسى سكت تماما، صمت، حس بإحساسي المرتبك من كل الطاقات اللي حوالينا انا وهو؛ لقت الموبايل من ع الأرض، الشاشة اتكسرت وطلعت حبر من الشاشة، طلعتله البطاقة.. اداها لواحد من أتباعه.. خد صور دي، في اللحظة دي جه واحد من كباتن السباحة وقالي ممنوع نزول الطفل لواحده عشان لو حصل له حاجه احنا اللي هانتسأل، قولتله انا مااعرفش. والله ما اعرف، وبعدين انا كنت معاه واقدر احميه، في اللحظة دي جت صورة البطاقة.. اخدت بطاقتي، تنزله التمرين، يخلص تمرين، تاخده ومااشوفاكش في النادي، عملت مشكلة تاني مش هااقعدك في البلد".
وأكد قائلًا: "مش هاأقعدك في البلد، والله العظيم أنا كل اللي عملته بعد الكلمة دي هو إني حضنت موسي ابني ومشيت وأنا في نفسي، إحساس مش هاعرف أشرحه بالكلام، حسبنا الله ونعم الوكيل".
