ضحية النصب بكفر الشيخ: عملولي محضر مزور بالتنازل عن بيتي

قال هشام صلاح عثمان من مركز الحمول، بمحافظة كفر الشيخ، إنه قد اشترى قطعة أرض تبلغ مساحتها 134 م، وعندما قرر أن يبني هذه الأرض توجه إلى المحامي الخاص به حتى يجهز له الأوراق الخاصة المطلوبة لتأمين الأرض واستخراج رخص البناء.

وأضاف عثمان أن المحامي اقترح عليه أن يتفق مع مشرف مقاولات حتى يشرف على بناء عقاره على هذه الأرض، مردفا: المحامي قالي ده هيوفرلك مش أقل من 500 ألف جنيه في العمارة بتاعتك وبالفعل أنا صدقته واديته أول دفعة من الفلوس وهى مليون و160 ألف جنيه، وفضلت اديله الفلوس على دفعات لحد ما وصلت لـ 3 ملايين و646 ألفا.

وتفاجأ هشام صلاح، بتحريض الجيران عليه، حيث توجه إليه شخص وأبلغه أنه دخل هذا المكان دون أن إذن أحد وطلب منه أن يوقع له على إقرار، مردفا: لما حصل مشاكل مع الجيران قالي روح اعمل محضر وبالفعل عملت محضر في مركز الشرطة وبعدها لقيت المحامي بيتصل بيا وبيقولي أنت اتنازلت عن بيتك للمقاول المشرف، وطلب مني اتصل بالمقاول وأقوله هات المحضر وتعالى نروح للمحامي، والحقيقة إنى كنت واقع في مصيدة والمحامي أوهمني إنه واقف جنبي وإنه هينقذني وأنا صدقته بالفعل.

وأكمل هشام صلاح عثمان حديثه قائلًا: لما روحنا للمحامي لقيته محضر إقرار مكتوب فيه إن البيت بتاعي وإن المقاول واخده وضع يد وبالفعل المقول مضى عليه والمحامي قالي مبروك انت بيتك رجعلك.

وأضاف هشام صلاح عثمان أنه بعد مرور نحو يومين توجه إلى منزله، ليجد المقاول ومعه مجموعة من البلطجية موجودين بالمنزل، وعلى الفور اتصل بالمحامي الذي ابلغه أنه بالمنصورة وأن المقاول يريد مبلغ مليون جنيه ليترك له المنزل، متابعا: قولتله طب والإقرار اللي احنا وقعنا عليه بالتنازل قالي لا القرار ده ميعملش حاجة وانت مش هتعرف تخش بيتك.

فيما قال هشام صلاح عثمان: أنا بطالب الرئيس السيسي أنه ينصرني في القضية دي، عملولي محضر مزور بالتنازل عن بيتي أنا وعيالي، وأنا حطيت مالي كله في البيت ده.