أحد السائقين بموقف البوهي بإمبابة: مستحيل يقع ميكروباص من كوبري الساحل وما حدش يلاقيه
تلقّت غرفة الحماية المدنية بمديرية أمن الجيزة، يوم الأحد الماضي الموافق 10 أكتوبر، بلاغًا من النجدة يفيد بسقوط سيارة ميكروباص من أعلى كوبري الساحل الواقع بين منطقتي روض الفرج وشبرا.
وعلى الفور انتقلت الأجهزة الأمنية إلى مكان البلاغ بصحبة رجال الإنقاذ النهري، وهناك تم الاستماع إلى شهود العيان.
وقال علي أحد السائقين بموقف البوهي بمنطقة إمبابة: الناس بتقول إن الحادثة حصلت بعد الضهر بس أنا بنفسي الساعة 6 ونصف الصبح شايف السور مكسور وفي زجاج جنب السور، فأنا استنتجت أن ممكن يكون في عربية الصبح كسرت السور ومشيت، لكن استحالة يكون في عربية وقعت وجواها ناس وما حدش يلاقيها، ومسمعناش عن أي مشاكل أو أي عربية مفقودة في مواقف إمبابة.
كما أضاف الشيخ محمود أحد السائقين بموقف الوحدة بمنطقة إمبابة: أنا صليت الفجر وطلعت بالعربية بتاعتي ولقيت السور كان واقع حتى كل الزباين في الميكروباص خدوا بالهم، وقبل العصر كانت الدنيا مقلوبة والناس كلها متجمعة وبيقولوا ده في عربية وقعت، طب ازاى وقعت والسور مكسور من الفجر أنا عن نفسي مشوفتش أي عربية وقعت.
وأكمل الشيخ محمود حديثه قائلًا: مافيش أي سواق ولا عربية مفقودة عندنا، عشان كل السواقين بتبلغ بعضها لو لا قدر الله حصل حاجة.
واستغاث الشيخ محمود لإصلاح فواصل كوبري الساحل قائلًا: بالله عليكم يا ريت فواصل الكوبري تتعمل عشان كلها متكسرة، ومن نحو أسبوع حصل حادثتين على الكوبري بسبب الفواصل المكسورة دي.
