مُعلمة تعتدي على أحد التلاميذ بالمنيا.. وأسرته: الولد اتعقد ومش عايز يروح المدرسة
استغاثت أسرة بمحافظة المنيا، بوزير التربية والتعليم، بسبب إعتداء إحدى المعلمات على ولدهم الطالب عبد الحميد ناصر، وهو بالصف الخامي الإبتدائي، ومُقيد بمدرسة عمانوئيل الخاصة بمدينة ملوي، الأمر الذي أدى إلى إصابة الطالب باضطراب نفسي.
وقال والد الطالب السيد ناصر: الموضوع بدأ أن المُدرسة كانت في الفصل، وفي طالب عمل صوت صفارة، فاتجهت ناحية عبد الحميد وقالتله أنت اللي صفرت قالها لا مش أنا دا فلان، وقبل ما يكمل نزلت ضرب فيه بالأقلام علي وشه.
وأكمل والد الطالب حديثه قائلًا: بعد كدا طلبت منهم يطلعوا الكشكول بتاع المادة، وقالها عبد الحميد معلش الكشكول مش معايا راح غلط مع مُدرسة الحساب هنزل أجيبه، قالتله روح وفعلًا نزل جاب الكشكول، وبعد ما رجع نزلت ضرب فيه تاني وضحكت عليه زملاءه.
وأضاف والد التلميذ: عبد الحميد فضل يبكي إلى أن دخل في حالة بكاء هستيري، فدخلت مشرفة الدور فضلت تهدي فيه وبعد كدا جه زميل للمُدرسة اسمه مستر اسامة، زعق في عبد الحميد وأجبره يعتذر للمدرسة.
كما أوضح السيد ناصر: بعد ما رجع عبد الحميد من المدرسة فضل يبكي ويقول أنا مش هروح المدرسة دي تاني شوفولي مدرسة جديدة.
وأشار والد الطالب خلال حديثه إلى أنه حرر محضرًا بقسم الشرطة، وطالب بضرورة تفريغ الكاميرات ومحاسبة المُدرسة وزميلها، وأوضح قائلًا مختتما كلامه: الولد اتعقد ومش عايز يروح المدرسة.
