ميكانيكي يُعيد شيكارة فلوس لصاحبها بالشرقية: حسيت أن في حبل نار حوالين رقبتي

عثر الميكانيكي السيد فرج علي حب الله، وهو من محافظة البحيرة، على شيكارة بها نحو ربع مليون جنيه في محافظة الشرقية، ولكنه قام بإرجاعها بعد 10 أيام إلى صاحبها.

وقال الميكانيكي السيد فرج: أنا حسيت أن في حبل نار حوالين رقبتي لما كان معايا الشيكارة، وعرفت صاحب الشيكارة عشان هو كان منزل بوستات كثيرة أوي على كل الصفحات، وقال اللي هيلاقي الشكارة هياخد 25 ألف جنيه.

تابع حديثه قائلًا: الشيكارة كان بقالها 10 أيام في بيتي ماعرفش مين صاحبها، وماحدش يعرف في البيت عشان أنا خايف على ولادي من الحمل، والنية كانت على الله إني هلاقي صاحبها.

وأضاف السيد الفرج: أول ما شوفت البوست بتاع صاحب الشيكارة، اتحركت على طول واتصلت بالراجل، وقلبي كان بيتقطع لما سمعت صوته، وربنا يكون في عونه على طول المدة دي كلها.

كما أوضح الميكانيكي: كان حمل كبير أوي عليا، وطبيعي أي إنسان يضعف، لكن الحمدلله أحنا في نعمة وراضين باللي ربنا كتبهولنا.

وأختتم حديثه قائلًا: أحنا الحمدلله شبعانين وعنينا مليانة، وأنا مش مستني فلوس من ربنا، لا أنا مستني خير ربنا، عشان ربنا هيدينا أكثر من الفلوس دي، وبكرة ربنا هيزدني بأكثر من الفلوس، وبتمنى من الله الرضا.