ابن شقيقة المواطن المذبوح بالإسماعيلية: اللي قتل خالي بيشرب مخدرات ومدمن
وقعت جريمة قتل بالإسماعيلية، اليوم الأثنين، حيث أقبل شاب على قتل مواطن بالإسماعيلية يُدعى أحمد، ويبلغ من العمر 51 عامًا، وذبح رأسه وتجول بها بشكل هيستيري في الشوارع بين المواطنين، وسط حالة من الدهشة والرعب منهم، بسبب صعوبة المنظر التي تقشعر له الأبدان.
وقال ابن شقيقة المواطن المذبوح بالإسماعيلية: بلاش اشاعات وماحدش يقول أنه اغتصب، أنا خالي عنده 7 عيال وأنا الثامن، وأنا مستني القانون ياخد مجراه وياخدلنا حقنا، والواد اللي قتل خالي ده أصلًا مش متجوز، وكان شغال مع خالي الثاني، ولسه طالع من المصحة وكان بيشرب مخدرات ومدمن.
فيما أوضح أحد الجيران: أحمد جارنا من 35 سنة، وكل الناس مش متخيلة اللي حصله عشان هو في حاله ومش بيختلط بحد، ده هو الوحيد الطيب في إخواته، واللي عمل فيه كده مش ممكن يكون حد عاقل، ده أي حد كان بيخش يحوش كان بيلطشه بالسكينة والخنجر.
وأضاف أحد شهود العيان: هو قاعد في بيته دايمًا مبيتكلمش مع حد ولا بيتخانق مع حد ولا بيزعق مع حد، والناس كلها بتحبه فحرام لما نسمع انهاردة إن واحد مسك سكينه وراح يقتله قدام الناس كلها، وأحنا بنطالب بإعدامه في ميدان عام قدام الناس كلها.
كما أضافت شاهدة عيان آخرى: أنا بقالي 16 سنة عايشة معاه في نفس البيت، ولا عمره غلط في حد.. دايمًا قاعد في حاله، حتى لو زعلنا مع بعض بيبقى في حاله، ومش بيخش بيوت حد.
