شاكوش يعلق على قرار وقفه نهائيًا: هنزّل أغاني على يوتيوب.. وماينفعش أتوقف في بلدي وأغني بره
علق مطرب المهرجانات حسن شاكوش على قرار نقيب المهن الموسيقية الفنان هاني شاكر الذي أكد سحب ترخيصه تمامًا دون رجعة، بعد توقيفه من قبل النقابة على خلفية مشكلته مع رضا البحراوي قبل نحو شهرين.
وقال حسن شاكوش خلال مداخلة هاتفية مع الإعلامي عمرو أديب في برنامجه الحكاية: ده أكل عيشي والفن اللي بأقدمه لجمهوري ماليش شغلانة تانية، مشكلتي كانت أنا ورضا البحراوي ودي أول مشكلة ليا.
وعن كيفية تصرفه جراء قرار وقفه بلا رجعة قال: رضا البحراوي بيشتغل، وقررت الفترة الجاية هاخد قرار مع النقابة هقعد معاهم ونشوف حل لأن دي أول غلطة كانت ليا.
واستكمل شاكوش: عاوز أرجع أشتغل في بلدي ما ينفعش أبقى موقوف في بلدي واشتغل برة مصر، وعندي حفلات خارج مصر في الإمارات وتونس ولكن ألغيت كل حفلاتي داخل مصر عشاب باحترم قرار النقابة.
وحول إمكانية طرحه أغاني على يوتيوب قال: الواحد ما لوش نفس يعمل حاجة، لكن أنا بسجل أغاني وناوي أنزلها الفترة الجاية مش هقعد في البيت.
واختتم حديثه: اللي فيه الخير يقدمه ربنا عاوزة آخد الخطوة والقرار، وأنا اتصالحت انا ورضا لأنه أخويا ورجع الشغل ربنا يكرمه ويرزقه.
وكان هاني شاكر قال إن ما فعله شاكوش شيء خطير، لأنه أدى الغناء بكلمات إباحية، والفن ليس بحاجة إلى هذا النوع.
واستكمل خلال لقائه مع برنامج et بالعربي: أنا وكل المجلس معايا سحبنا ترخيصه تمامًا دون رجعة، بناقص حسن شاكوش، مضيفًا: أطلع أغني غنوة إباحية على المسرح، وأغلط في فئة مهمة في الموسيقى العربية، الطبالين ولادنا وإخواتنا، المثل موجود أنا عارف، لكن يطلع يقوله على المسرح ويبقى قاصد الإهانة هذا لا يجوز.
