عمر كمال: أي مهرجان فيه ألفاظ مش كويسة يتمنع.. والجمهور: جبت ورا بعد قرارات النقابة

تعرض الفنان عمر كمال لهجوم حاد، وذلك بعد حديثه عن أغاني المهرجانات، ووصفه إياها أنها تؤذيه نفسيًا، ولا يصح أن تسمعها الأسر المصرية، وأثار بذلك حالة كبيرة من الجدل.

ورد عمر كمال، على ذلك الجدل عبر حسابه بموقع فيسبوك، وأوضح حقيقة مهاجمته أغاني المهرجانات حيث قال: مهاجمتش أصحابي خالص، بالعكس قولت أي كلام خارج يتمنع، أي مهرجان فيه ألفاظ مش كويسة يتمنع، وياريت نقنن المهرجانات.

وأضاف كمال: أنا غِلطت في أول حياتي، قُلت جملة في أغنية بنت الجيران واتحاسبت عليها، قعدت 9 شهور في البيت وتعلمت من غلطي، وقولت زي ما الراب ليه شعبة نعمل للمهرجانات شعبة، وده ما دام مفيش كلام خارج لكن ماهاجمتش حد، أي حد بيغني مهرجانات أخويا، وكلت معاهم عيش وملح وضافوا ليا، ومن غير مطربي المهرجانات ماكنتش نجحت.

فيما سخر الجمهور من حديث عمر كمال فجاءت التعليقات كالتالي: إنت يا عمر كان حد يعرفك قبل المهرجانات؟، سيبك بس إنت خلعت من قرارات النقابة، وجبت ورا بعد قرارات النقابة، وأشرب خمور وحشيش دي مين اللي مغنيها؟، على أساس حضرتك إمام مسجد؟، دلوقتي بنت الجيران بقت غلط؟، كنت بتقول بنت الجيران متجيش تاريخ سعد الصغير ليه؟ بالنسبة لكل فيديو كليب حضرتك تجيبلنا رقاصة فيه، عشان تقوم بالواجب وزيادة بيبقى شكلك حلو؟ آخرتك قربت يا برنس، كباريه بالليل وعمرة الصبح! وغيرها من التعليقات والهجوم الحاد الذي تعرض له الفنان.

ويُعد عمر كمال، واحدًا من أبرز مطربي المهرجانات، حيث قدم أكثر من مهرجان شعبي، وحقق من خلاله ملايين المشاهدات، على مواقع الفيديوهات ويوتيوب.