سيدة تحرم طليقها من رؤية أطفاله والأب يستغيث: ابني قالي لو جيت تشوفنا هنحبسك | لايف
ابني قالي هشيل أسمك ولو جيت تشوفنا هنحبسك.. بهذه الكلمات وجه أب استغاثته، بعد أن حرمته زوجته من رؤية أولاده بشكل طبيعي، ودست في عقولهم شكل خاطئ عن والدهم، جعلتهم يستنكرون وجوده.
تفاصيل الخلافات
أما عن تفاصيل الخلاف بين الزوج والزوجة والذي أدى إلى طلاقهما، قال الزوج وهو أحد سكان منطقة حلوان: الخلافات والمشاكل كانت طبيعية بين أي زوجين، وكان ممكن لو اتكلمنا في المشاكل دي نحلها بشكل ودي، لكن أنا اتفاجئت في يوم بعد ما ودتها تزور أهلها، إنها بتقولي طلقني.
وأشار خلال حديثه إلى أن طليقته قررت ألا يتم الطلاق بشكل ودي ورفعت قضية عليه في المحكمة، وبناءً عليه أخذت كافة حقوقها، مضيفًا: جبنا خبير عشان تاخد كل حقوقها اللي في القايمة، ولقيت نفسي كنت ماضي على حاجات مش موجودة في الجهاز أصلا لكني دفعت تمنها، حتى الكوباية اللي إتكسرت وكانت في الجهاز دفعت تمنها.
أما عن رؤية الأب لأبنائه في الأسبوع والتي سمحت بها المحكمة، واصل الأب حديثه: الأولاد مبقوش عايزين يشوفوني، ولما بروح أشوفهم في مكان عام بيكونوا قاعدين بعيد عني، ومش بيرضوا يتصوروا أو يتكلموا معايا.
وأكمل الأب: ابني بيقولي إنهم هشيلوا اسمي، وماتجيش تشوفنا تاني عشان هنسجنك، وطليقتي موصلة فكرة وحشة عني للأولاد، وبقوا مش عايزين يشوفوني مع إني عمري ما قصرت معاهم في مصاريف، وديما بجيب اللي يتمنوه.
واختتم الأب حديثه: نفسي أشوف أولادي بصورة طبيعية، ويجولي يوم يباتوا معايا زي زمان، وأنا هرجعهم تاني يوم لمامتهم، وجدتهم وجدهم هما اللي ربوهم وبيقولوا نفسنا نشوفهم قبل ما نموت.
