بث مباشر | وكيلة مدرسة تدعم معلمة المنصورة: ليه تكسروها وهي معملتش حاجة غلط؟
علقت دودو فريد، وكيلة إحدى المدارس على واقعة مقطع فيديو رقص معلمة في مدينة المنصورة بمحافظة الدقهلية.
وقالت إن المعلمة فعلت ذلك، وهي خارج إطار عملها، لذلك فهي يحق لها أن تفعل ما تشاء، ما دامت ليست في مكان عملها أو أثناء ممارستها لعملها.
تعليق وكيلة المدرسة على الواقعة
وأضافت دودو فريد قائلة: هي ممكن تكون تجاوزت شوية بس دي حاجة ترجع ليها هي بقى لـ عاداتها وتقاليدها وسلوكيتها، يعني دي حاجة خاصة بيها هي كـ شخصية، لكن مش كـ معملة، لأن هي معملتش كدة بصفتها معلمة، وهي واقفة في الفصل ولا في فناء المدرسة.
كما أوضحت أنها هي وأي شخص في العالم، يرقصون في المناسبات السعيدة، فهل هذا حرام أو خطأ؟ لافتة إلى أن المعلمة، فعلت ذلك وهي لا تمارس عملها، لذلك فمن المفترض ألا تُحاسب على فعلتها.
وتابعت: أي موظف في أي مؤسسة في الدولة، ما دام شغله انتهى يبقى الدور الرقابي عليه انتهى، إلا إذا كان عمل حاجة شاذة وخارجة عن الأخلاق، لكن الحرية الشخصية ليه أخليها تريند وأبقى متصيد للناس وخصوصًا المدرسين، والمدرس ده لو حصله أي كارثة ماحدش هيهتم بيه زي حادثة مثلًا.
غضب وكيلة المدرسة من استقالة المعلمة
بينما عبرت دودو فريد، عن استيائها من قرار المعلمة التقدم بـ استقالتها من عملها في المدرسة بعد انتشار مقطع الفيديو.
وقالت: أنا ده اللي مزعلني ليه الست تبقى منهزمة ومكسورة وهي ماعملتش حاجة غلط، احنا هنعتبرها غلطت في نظر المجتمع، بس مش معناه إننا ندبحها ونخليها تعتكف الحياة، شكلها ايه دلوقتي قدام ولادها أصلًا؟.
تفاصيل الواقعة
وتعود أحداث الواقعة إلى انتشار مقطع فيديو على مواقع التواصل الاجتماعي، تظهر فيه معلمة وهي ترقص مع بعض زملائها من المعلمين، أثناء خروجهم في رحلة نظمتها نقالة المعلمين، على مركب في نهر النيل بمدينة المنصورة في الدقهلية.
