أوهمت نفسي بتمثيل شخصية مريض لاستكمال العلاج.. صبري عبد المنعم يروي تجربته مع السرطان | فيديو
قال الفنان صبري عبد المنعم، إنه أجرى عملية مياه بيضاء، ولكنه لم يفقد البصر كما أشيع وقتها، بل كان مهددا بفقدان البصر فيما قبل، لأنه يعاني من مشاكل في العينين منذ زمن بعيد.
هل فقد صبري عبدالمنعم البصر؟
وأضاف خلال حديثه مع الإعلامي عمرو الليثي في برنامج واحد من الناس، المذاع عبر فضائية الحياة: أنا اتولدت كويس وكله تمام، وبعد سنة فقدت البصر نهائيا، وبحكم شغل والدي، كان عارف بعض الأطباء الأجانب، وأخدني لواحد فيهم، وأجريت عملية سريعة جدا.
وتابع الفنان في تصريحاته: بعد العملية شوفت، حتى عام 1967، حصلت ظروف واشتغلت في محطة بنزين، فالسولار والأبخرة والحاجات دي كانت بتطلع على عينيا مع الحر، طلع لي قرحة قرنية في العينين وعملت عملية كي العين وقتها.
إصابة صبري عبد المنعم 3 مرات بالسرطان
وأكمل صبري: سنة 2001 جالي السرطان، أول مرة حسيت بآلام شديدة في دراعي الشمال، روحت بالأشعة للدكتور، قالي إنت المفروض كنت العملية امبارح، قالي يبقى نعملها بكرة، وبالفعل عملناها تاني يوم، وخدت علاج كيماوي مع إشعاعي، وربنا يكون في عون اللي بيتعالجوا.
وأردف قائلا: سنة 2002، حسيت بألم شديدة في الرئة، روحت للدكتور بالأشعة، قالي عملية، عملناها وشيلنا الرئة اليمين، وخدت علاج إشعاعي وكيماوي لمدة طويلة.
واستطرد حديثه قائلا: سنة 2004، حسيت بآلام شديدة في منطقة الصدر، جالي السرطان في حتة مش بيجي لحد فيها خالص، جالي في الغشاء البلوري، وده ملوش جراحة، قلت لهم نعمل علاج كيماوي وإشعاعي، يوم كده ويوم كده، في الأول رفضوا، ثم قلنا نجرب.
وروى تفاصيل العلاج، فقال: بدأنا من أغسطس 2004، لإبريل 2005، كنت يوميا لحد ما راح خالص، وكانت فترة غريبة جدا، وكملت علاجي في السعودية، فقلت هعمل نفسي إني بمثل دور شخص مرض بالكانسر، والحكاية ديه ساعدتني كتير جدا، واتعلمت إن الشخص ليه نصيب من اسمه، وهو الصبر، من 2002 إلى 2005 في مراحل العلاج المختلفة.
