اللي مش عاجبه ما يدخلش صفحتي.. بوسي شلبي ترد على انتقادها بسبب فيديو جون ترافولتا | خاص
ردت الإعلامية بوسي شلبي، على انتقادات الجمهور لها؛ بعد ظهورها في فيديو، من حفل توزيع جوائز Joy Awards بالسعودية، ودعوتها للنجم العالمي جون ترافولتا لزيارة مصر.
وتواصل القاهرة 24، مع الإعلامية بوسي شلبي؛ لتوضح حقيقة الأمر، فقالت: الموضوع مش شايفاه مهم للدرجة دي، إحنا أكبر من كده، ومصر أكبر من كده، وأنا واحدة كنت بهزر على صفحتي الشخصية، ده مش شغلي ولا برنامجي.
وتابعت بوسي شلبي: أنا خلصت شغلي على ريد كاربت، ومش ماسكة مايكروفون مذيعة بتحاور واحد يعني، ولا طالعة في برنامج CNN على قناة رسمية، ولا أنا رايحة مهرجان أوسكار في أمريكا فضحتهم ولّا عملت مشكلة.
وأضافت بوسي شلبي: أنا واحدة بكلم الفانز بتوعي على صفحتي، حتى بكلمهم بالعربي، مش بكلم جون ترافولتا خالص، وماسكة الموبايل، وبكلم الفانز بتوعي، وفاتحة لايف بتكلم معاهم وشايفاهم، ودي صفحتي الشخصية، وأنا حرة أعمل اللي أنا عاوزاه، ده مش في برنامج بتاعي، وده حقي، واللي مش عاجبه يدخل على صفحتي الشخصية؛ مايدخلهاش، أنا هنا مش بوسي المذيعة، أنا هنا واحدة من الجمهور، زيها زي أي حد بيشوف فنان.
وعن مطالبتها للفنان أشرف زكي بدعوة جون ترافولتا، أوضحت بوسى شلبي: كنت أقصد أن الفنان أشرف زكي يعزمه على مهرجان القاهرة وهذا دليل على حبي لوطني وقلت الكلام ده أثناء غناء هانى شاكر أغنية تحيا مصر فى وسط المسرح ومتسجل.
أزمة فيديو بوسي شلبي مع جون ترافولتا
ظهرت بوسي شلبي في فيديو لايف عبر حسابها بموقع التواصل الاجتماعي، وهي تلقي التحية على جون ترافولتا، وتطالبه بزيارة مصر، وهو الفيديو الذي حاز ردود فعل واسعة، ووصفه البعض على مواقع التواصل بأنه: فضيحة- على حد قولهم-.
وبدأ الأمر حينما تحدثت بوسي شلبي باللغة الإنجليزية، مرحبة بالنجم العالمي، وقالت: أنت أيام شبابي الحلوة كلها يا ترافولتا، شوفتوا ترافولتا، شوفتوا القمر، ثم طالبت الفنان أشرف زكي بدعوته إلى المهرجانات المصرية، وقالت: اعزمه على المهرجان يا أشرف، وسط ضحك من الحاضرين.
