أهالي الحسين: الحريق خرب بيوتنا واترمينا في الشارع | بث مباشر
اندلع حريق هائل مساء الاثنين في محيط مسجد الإمام الحسين بمنطقة المشهد الحسيني في القاهرة، وتصاعدت ألسنة اللهب بشدة وحاول الأهالي العمل على إطفاء الحريق حتى وصلت سيارات الإطفاء التي نجحت في السيطرة على الحريق المندلع.
آثار الحريق
وتحدثت إحدى الأهالي عن تفاصيل اندلاع الحريق لـ القاهرة 24، فقالت: كل حاجة تدمرت وكل البيوت تدمرت، إحنا كنا قاعدين امبارح وفجأة لقينا النار بقت فظيعة في كل حتة وكلت كل البيوت والمحلات، والأوضة اللي احنا كنا قاعدين فيها ادمرت ومبقاش فيها حاجة سليمة خالص واترمينا في الشارع.
كما أضافت أخرى: أنا معايا ابني عنده سنة ومرمي في المستشفى من امبارح عشان مافيش أكسجين داخل جسمه، وأنا كنت بموت حرفيًا وكنت نايمة ساعتها يدوبك غفلت 5 دقائق أنا وابني ولقيت النار كان هين عليا أرمي ابني من الشباك وأنط وراه من شدة النار، والموتوسيكل اللي جوزي كان بيشتغل عليه اتحرق ومافيش مليم هنعرف نجيبه خلاص نعيش بيه، أنا لسه متجوزة مبقاليش سنتين، وحاجتي كلها ادمرت في البيت من الحريق.
إصابات الحريق
جدير بالذكر أن وزارة الصحة أعلنت عن أعداد المصابين في حريق محيط مسجد الإمام الحسين الذي نشب أمس الأحد، حيث أوضح الدكتور حسام عبد الغفار، المتحدث الرسمي باسم وزارة الصحة والسكان المصرية، أنه نتج عن الحريق إصابة 11 شخصًا بالاختناق، مؤكدًا على أنهم جميعهم يتلقون الرعاية الطبية اللازمة في مستشفى الحسين الجامعي، وذلك لحين تحسن حالتهم الصحية وشفائهم بشكل كامل.
