بعد الحكم بإعدام المتهم.. والدة مهندس الدقهلية: فرحتي ممزوجة بالألم عشان فقدت ابني | بث مباشر

عبرت والدة المهندس أحمد عاطف، ضحية غدر الصحاب في محافظة الدقهلية، عن سعادتها بـ صدور حكم بالإعدام من محكمة جنايات المنصورة، أمس الخميس الموافق 17 من فبراير الجاري، ضد المتهم بقتل ابنها عمدًا مع سبق الإصرار والترصد.

حديث والدة مهندس الدقهلية الضحية

وقالت والدة المهندس أحمد عاطف: الحمدلله إن ربنا جابلي حق أحمد، ربنا وفقنا الحمدلله بـ دعواتنا ودعوات الناس كلها اللي كانت بتدعيلي إن ربنا يجبلي حق أحمد ابني، قلبي طلع من جسمي لما سمعت حكم الإعدام عشان قلبي كان بينزف دم مش دموع عشان ابني اللي فقدته لأنه كان حاجة غالية عندي جدًا.

كواليس محاكمة المتهم بقتل مهندس الدقهلية

أما عن كواليس محاكمة المتهم بقتل ابنها المهندس أحمد عاطف، ضحية غدر الصحاب في الدقهلية، قالت: كنت حاسة بـ روح أحمد إنها كانت موجودة معايا امبارح في المحكمة، كان وشه كده في وشي وبقيت أقول لـ والده أحمد عايش ومماتش أنا حاسة إنه فرحان وبيقولي أه يا ماما كده أنتوا جبتولي حقي الحمدلله، بس أنا فرحتي كانت ممزوجة بالألم كنت حاسة إن قلبي بينزف.

كما تحدثت والدة مهندس الدقهلية عن المتهم بقتل ابنها، فقالت إنه لا يملك شيئًا من الرحمة في قلبه حتى يفعل في ابنها ما فعله، موضحة: ده مايعرفش ربنا لأنه لو بيعرف ربنا وبيسجد ليه كان هيتقي ربنا في كل أعماله، ده كان أقرب صاحب ليه وكان بيجيلنا البيت على طول.

محاكمة المتهم بقتل مهندس الدقهلية 

وجدير بالذكر أن محكمة جنايات المنصورة، أصدرت أمس الخميس قرارها الذي يُفيد بـ إعدام المتهم بقتل المهندس أحمد عاطف، وذلك بعد أخذ الرأي الشرعي في إعدامه، بالإضافة إلى ورود قرار من فضيلة مفتي الجمهورية، حيث ألقى المتهم صديقه الضحية من أعلى كوبري جامعة المنصورة بسبب مبلغ من المال.