أحمد مجدي يكشف كواليس الآنسة فرح: أسماء أبو اليزيد سابت فيا الأثر اللي بَمَثِّل عشان ألاقيه
تحدث الفنان أحمد مجدي، عن دوره في مسلسل الآنسة فرح بعد عرض الجزء الخامس مؤخرًا، كاشفًا عن التحضير لشخصية شادي الذي عمل عليها لمدة 3 سنوات ما أثر في حياته بشكل كبير.
وكتب أحمد مجدي عبر حسابه الخاص بموقع انستجرام قائلا: أول ما اتعرض عليا مسلسل الآنسة فرح تفاءلت بسبب العناية والمجهود المبذول في تقديم ملف واضح ومتماسك للعمل.. ولما قعدت مع المنتجة سالي والي كنت متحمس جدًا وطلبت مني أزوّد وزني حوالي 10 كيلو.
وأضاف مجدي: التحضير لشخصية شادي والشغل عليها لمدة 3 سنين أثّر في حياتي وفي حياة اللي حواليا بأشكال كتير.. كنت محتاج أعمل نقلة على المستوى الجسدي والنفسي، والدور ساعدني في ده.. متشكر جدًا للإنتاج الجدع المخلص والناس الشاطرة اللي عارفة شغلها واللي اتعلمت منها كتير.
وتابع أحمد مجدي موجهًا الشكر لأسماء أبو اليزيد قائلا: متشكر لأسماء أبو اليزيد الجميلة المحترمة اللي عشت معاها لحظات فنية وإنسانية سابت فيّا الأثر اللي بامثل عشان ألاقيه.
واستكمل: وشكرًا لرانيا ومريم وهبة وتامر وكيلاني وعارفة وكل اللي مثلوا في المسلسل.. اختيار الممثلين من أول لحظة لحد نهاية المسلسل، لو حتى هيعدّي بس قدام الكاميرا، اتبذل فيه مجهود كبير من وائل فرج وطاقم الإخراج.. اللي أضاف ليا كتير وأصبحوا أصدقاء حقيقيين. وعمري ما أنسى حسن عتيق وإيمان من قسم الديكور والإكسسوار وكل الطاقم الجميل.. وعبد الرؤوف وديشا في التصوير والإضاءة وكل الشباب الجامد.. القائمة لا تنتهي! عمل أخد سنين وأتمنى نفضل نعمله على طول.
بدروها ردت أسماء أبو اليزيد على إشادة أحمد مجدي بها وكتبت: يا مجدي أنت من أجمل البني آدمين والفنانين اللي عرفتهم وطاقتك الحلوة خلت حاجات كتير تكون سلسة وجميلة وصادقة للأبد يا صديقي.
