“في التجمع وبيحصل كدا”.. العثور على طفل “حافياً” من حضانة “انترناشونال”
في واقعة أثارت غضباً كبيراً على مواقع التواصل الاجتماعي، نشرت فتاة “بوست” على صفحتها الشخصية بموقع التواصل الاجتماعي “فيسبوك” أمس، تحدثت فيه عن إهمال جسيم في إحدى الحضانات الموجودة بالقاهرة الجديدة، حيث لاحظت تواجد طفل صغير في الشارع عمره لا يتعدى الـ3 سنوات بالقرب من حضانة انترناشونال “حافياً” بعد أن خرج من الحضانة دون أن يشعر به أحد.
وكتبت “دينا محمد”: “أنا النهاردة كنت فى التجمع الاول رايحة مشوارى الصبح وانا ماشية بالعربية، لقيت ولد شكله جميل جدا لابس حلو جدا وماشى بشراب فى الشارع، ودة اللى لفت نظرى فى شارع كلو عربيات وطريق رايح وطريق راجع وقفت بالعربية، وركنت ونزلت انا وصحابى”.
وأضافت،” بتكلم مع الولد لقيتو تقريبا ٣ سنين مش اكتر، حاولت اكلمو عربى مفهمنيش اتكلمت انجليش رد عليا، وقالى اسمو واسم بابا وماما انا ترجمت انو فتح باب بيتو ونزل من غير ما حد يشوفو (( متوقعتش ابدا اللى حصل))، حبيبى فين البيت ابتدى يشاور وقولت انا مش هسيبو غير فى بيتو، شيلتو ومشيت كتير على حسب ما بيشاورلى.
وتابعت، “حسيت انو مش عارف شوفت بوابين واقفين قولت هسال يمكن حد يعرفو، كلو قال معرفش واحد فيهم قالى انا بشوف الولد دة مامتو منزلاة قدام (الحضانة) اللى على الشارع برة، وهنا كانت الصدمة بنسبالى الولد خرج من ان لحضانة من غير ما حد يشوفو ولا يلاحظ ازاى؟؟ هسيبلكو انتو الرد”.
ولفتت الفتاة إلى أنها استعانت بالشخص الذي كان يرى الطفل من قبل، “روحنا الحضانة بعد مشى كتير وقعدنا نخبط على الباب بتاع الفيلا، اللي هيا الحضانة الانترناشيونال الكبيرة المحترمة، اللى بتاخد مبلغ محترم علشان تسيب الولاد يخرجو لوحدهم، من غير حتى ميلاحظو ولا يكتشفو دة حتى بعد خروج الولد بساعتين قعد الراجل يخبط وبعد حوالى ٥ دقايق فتحو وهما فى منتهى البرود”.
وأشارت أنها عند سؤال أحد العاملين بالحضانة عن كيفيه خروج الطفل، علامات الدهشة والرعب ظهرت عليه، كما أن الطفل بدا منهاراً ولا يرغب في العودة إلى المكان مرة أخرى.
الغريب أيضا أن أحد سائقي الميكروباص كان يقف أمام الحضانة أثناء الواقعة وقال للفتاة: “انتو اهل الولد دة قولتلو لية؟ قالى دة بقالو ساعتين نايم تحت العربية دى!، البوليس جه وكلمت بابا الولد واستنيتو لحد ما جية واستلم الولد، وتفاصيل اكتر من كدة ومشينا و”آدم ” ندة علينا وهو بيقولنا باى بكل حب كأنو بيشكرنا من مجهول كان رايحلو، ابوس ايديكو مش قد المسؤلية متشيلوهاش احنا مسلمنكو قلوبنا وعمرنا” .
وبعد موجة من الغضب والانزعاج التي أحدثتها الواقعة، دشن رواد مواقع التواصل الاجتماعي هاشتاج بعنوان” #اغلاق_حضانه_tiny_town” و “#close_tiny_town_nursery”، بهدف إغلاق الحضانة نهائياً ومحاسبة المتسببين في الواقعة مؤكدين أنه إهمال لايمكن السكوت عليه.
ومن حانبها نشرت الصفحة الرسمية للحضانة، اليوم، بيان اعتذار قالت فيه: “أن الحضانة لا تنفى وقوع الحادثة، ولكن الحضانة بتؤكد أن الحادثة لم تستغرق هذة المدة التى ذكرتها هذة السيدة، ولم تحدث بهذا الشكل ولكن الحضانة معترفة بحدوث الخطا، وأحذت الأجراءات اللازمه الأمس بالأتصال الشرطة والأتصال بولى أمر الطفل الذي لم يوافق نهائيا على عمل محضر للحضانة للمعرفتة بأن هذة الحضانة على قدر المسؤلية وأنها تخدم الطفل لأكثر من 3 سنوات”.
