عامل النظافة المطرود من كشري التحرير بسبب ملابسه: صعبت عليّا نفسي.. أنا مش أقل من حد وبشتري بفلوسي | بث مباشر

أجرى القاهرة 24 حوارا مع عامل النظافة، صاحب واقعة كشري التحرير، وأحد مسئولي محل كشري التحرير، لكشف كواليس الواقعة بعد انتشارها بشكل كبير على مواقع التواصل الاجتماعي، حيث قام أحد العاملين بمحل كشري التحرير بطرد عامل نظافة اعتراضا منه على ملابسه الممزقة.

عامل النظافة في مواجهة مسئول كشري التحرير

وعبر مسئول كشري التحرير عن أسفه لعامل النظافة الذي يدعى محمد، حيث قال: أنا بعتذرلك يا محمد باسم المحل كله، واللي حصل ده عمل فردي والشخص اللي عمل كدا مش موجود بينا دلوقت وتم طرده.

ومن جانبه قال عامل النظافة: اللي مزعلني الإحراج اللي اتعرضت له امبارح قدام الناس.. أول ما دخلت المحل ولسه هطلب علبة الكشري يقولي المسئول اخرج بره.. هدومي مش نضيفة اه بس كفاية عندي إن أنا راجل شريف وأقدر أقعد في وسط الناس دي وأكل زي أي حد بفلوسي.

وتابع عامل النظافة، صاحب واقعة كشري التحرير: الناس بتاخد الأكل وتروح تاكله في العربيات الملاكي وترمي الزبالة في الشارع وإحنا اللي بنلم عليهم.. أنا عمري ما أدخل المحل دا تاني ولو ببلاش.. كسرة النِّفس اللي اتعرضتلها امبارح قدام الناس تمنعني إني أخش المكان دا تاني.

واستكمل عامل النظافة: أنا باجي كل شهر أو شهرين آخد من المحل دا وبنقف بره على الباب والطلب بيخرج لنا، ولكن المرة دي مكانش حد موجود فدخلت علشان أدفع الفلوس وأخد الحاجة لقيت العامل بيقولي اخرج بره.. صاحب المحل كلمني واعتذر لي آه لكنه واضح إنه متكبر إنه ييجي يقابلني، لإنه حدد معايا معاد النهارده الساعة 12 ومجاش بردو واستنيته كتير، وأنا مش هتراضى إلا لو جه هو اعتذرلي، بدخل محل سمك ومحل كبابجي من أكبر المحلات وبيعاملونا بكل احترام ويجيبوا لي الطلب ويقولولي اتفضل.