بعد إهداء جائزتها له.. تامر حسني لـ هنا الزاهد: نوع القلوب ده مبقاش موجود أوي
رد الفنان تامر حسني على إهداء الفنانة هنا الزاهد؛ جائزتها التي استلمتها من مهرجان الفضائيات العربية له، وذلك بعد تكريمها عن دورها في فيلم بحبك.
وكتب تامر حسني عبر حسابه الرسمي بـ انستجرام؛ منشورًا وعلّق فيه: بكتب بوست عن هنا والله والله مش عشان بتهديلي الجايزة لا.. بكتب كلمة من قلبي عشان هي بنت قلبها جميل ومقدرة المجهود اللي عملته عشانها وعشان كل الممثلين.. نوع القلب ده مبقاش موجود أوي.
وأضاف تامر حسني: ياما ناس بتساعد ناس بس نادرين أوي اللي قدروا المجهود دا، وعندهم قلب جميل يخليهم مينسوش تعب الناس اللي كانوا جانبهم وأخلصولهم من كل قلوبهم.. كنت فاقد الأمل في النوع دا من القلوب.. يمكن عشان قدمت ناس كثير، وللأسف معظمهم قلوبهم اتغيرت بعد ما نجحوا.. بس للأمانة هنا الزاهد هي هي نفس القلب الأبيض الجميل من أول يوم اكتشفتها فيها في مسلسل فرق توقيت بدور بسيط في بدايتها، لحد فيلم بحبك اللي هي بطلته دلوقتي.
واختتم تامر حسني حديثه: الفيلم اللي حقق أعلى إيراد دولي في تاريخ مصر والعرب وتجاوز الـ 600 مليون - في ظاهرة أولى من نوعها ومش بس إيرادات، لا ده حقق أعلى عدد زوار سينما في تاريخ السينما، وبتتكرم عنه دلوقتي بجايزة مبياخدهاش إلا المتميز المُبدع.. افرحي بنجاحك وبشغلك الرائع في الفيلم.. مبروك يا هنا.. كل الناس بتحبك، وكل الناس فرحانة بيكي وأنا بجد فخور بيكي وبقلبك الجميل المحترم الأصيل.. شكرًا على الجايزة.. مستنيها في شركتي مليش دعوة مليون مبروووووووك يا أجمل هنا.
