هشام المليجي عن سبب عدم شهرته مثل نجوم جيله السقا وهنيدي: مش بنافق
كشف الفنان هشام المليجي سبب ظهوره القليل في الأعمال الفنية خلال الفترة الأخيرة وعن تشابه اسمه مع الفنان محمود المليجي وتأثير ذلك عليه.
هشام المليجي يوضح سبب غيابه
وقال الفنان هشام المليجي خلال لقائه مع الإعلامية راغدة شلهوب: الشغل بالنسبالي مش مشكلة وهشام سليم شخصيا كان بيشتكي من الشغل قبل ما يموت ويقول ما بيشغلونيش والفنان في فترات بينور فيها وفترات الأضواء بتنحصر عنه وربنا يزيد كل الناس اللي وصلوا من دفعتي محمد هنيدي والسقا والتمثيل عمل جماعي وانت بتبقى ترس جوه الموضوع وممكن يكون السبب في إني ما بقيتش زيهم إني مش متناغم.
وأَضاف الفنان هشام المليجي: والسبب إني مش متناغم هو إني مش بنافق أو بقول رأيي بصراحة والمجتمع لازم يبقى في دبلوماسيات وأنا ما عنديش الحتة دي وبيبان عليا لو كدبت فمبعرفش أكدب أو أنافق.
وتابع هشام المليجي: لسة لحد دلوقتي الناس بتراهن إني ابن أو حفيد محمود المليجي لكن أنا مش قريبه من قريب أو بعيد وما قبلتوش في حياتي قبل كده وأنا فعلا اتظلمت بسببه؛ ولأنه كان عظيم جدا والظلم بالنسبالي هو المقارنة أو أني اتنسب ليه فأظلمه هو برضو.
آخر أعمال هشام المليجي
يشار إلى أن من آخر الأعمال التي شارك فيها الفنان هشام المليجي مسلسل قيد عائلي والذي عرض على شاشات التلفزيون في عام 2019 وتدور أحداثه حول صراع المال بين عائلتين وذلك يعرضهم لمعارك عنيفة واختلاف شديد بسبب الصراع على الميراث، ويتجاهل الطرفان صلة الرحم بينهما من أجل الثروة وتتابع الأحداث.
