الراقصة هندية: اعتزلت بعد وفاة أخويا وقُلت دي إشارة من ربنا.. وأنا مستورة مش محتاجة شغل
كشفت الراقصة هندية، تفاصيل اعتزالها الرقص، مؤكدة أنه لم يرغمها أحد على الاعتزال، كما أنها لم تعتزل مهنة التمثيل، ولكن لم يُعرض عليها دور يضيف لها على حد قولها.
بعد وفاة أخويا مرجعتش للشغل تاني
وقالت هندية في تصريحات تليفزيونية: أنا اتجوزت رجل الأعمال أيمن السويدي ودي قصة معروفة جدًا، وأنا متجوزاه كان سايبني بشتغل عادي لمدة شهر، وبعدين قعدت سنتين ونص في البيت، وهو كان زكي جدًا وعمره ما قالي متنزليش الشغل، ولكن كان بيقولي أنا عايزك تقعدي معايا، ومرة جاب مياه ودلقها على شعري علشان منزلش.
وأضافت: في مرة قالي انزلي بسرعة عايزك علشان بابا في المستشفى، ونزلت وأنا بالروب اللي كنت لابساه فوق بدلة الرقص، وقعدنا نلف في الشارع وقالي لأ أنا مزاجي إنك متشتغليش النهاردة، ودي كانت القشة اللي قسمت ظهر البعير، وقُلت له أنا معايا رجالة محترمة اللي هما فرقتي والناس اللي شغالة معايا، ودول ضهري وإخواتي ومش هينفع أطلع صغيرة قدامهم.
وأضافت هندية أنها اعتزلت مهنة الرقص نهائيًا بعد وفاة شقيقها قائلة: بعد أسبوع أخويا توفي وقُلت ربنا بعتلي إشارة ومن ساعتها مرجعتش للشغل تاني.
أما عن اعتزالها التمثيل فعلقت قائلة: أنا مش معتزلة التمثيل ولا حاجة، ولكن بعض المنتجين كانوا بيبعتوا ليا أدوار مش مناسبة، يعني لو مش هتضيف حاجة ليا أنا مش عايزاها، وأنا الحمد لله مستورة جدًا ومش محتاجة أدور على شغل من أجل إني أتعايش.
