بعد تكريمها بجائزة الهرم الذهبي.. نجوم الفن يحتفلون بـ عيد ميلاد لبلبة في افتتاح مهرجان القاهرة السينمائي
احتفل نجوم الفن بعيد ميلاد الفنانة لبلبة، منذ قليل في حفل افتتاح مهرجان القاهرة السينمائي الدولي بدورته الـ 44، بعدما كرمت لبلبة بجائزة الهرم الذهبي لـ إنجاز العمر.
وقالت لبلبة في كلمتها عقب تكريمها: بشكر كل اللي اشتغلت معاهم الممثلين والمخرجين والعمال اللي أتربيت وسطهم، وبشكر كل زمايلي اللي في بيني وبينهم عشرة طويلة وبحبهم وعارفة أنهم بيحبوني.
وتحدثت لبلبة عن أمنية والدتها بتكريمها باكية: دايمًا لما ببص في الكواليس بلاقي والدتي بتشجعني ومفيش مرة ماكنتش واقفة في الكواليس، لما كانوا يعلنوا عن مهرجان القاهرة تقول لي إنتي هتتكرمي وما يحصلش نصيب، والسنة اللي بعدها تقول لي هتتكرمي السنة دي أنتي أكتر واحدة اشتغلتي وبرضه ما يحصلش نصيب، ودلوقتي أنا بحقق لها أمنيتها، ولكن هي مش موجودة وأنا بتكرم النهاردة.
وروت لبلبة موقفًا طريفًا عن ولادتها قائلة: والدتي لما كانت حامل فيا كانت بتتفرج في السينما على فيلم وجالها وجع الولادة وبسرعة لحقوها ولو ماكنوش ودوها المستشفى كنت هتولد في السينما، مضيفة: اللي حصل حاجة غريبة لأني أتولد زي النهادره 13 نوفمبر الساعة 12.
وعلى الفور وقف جميع الحضور ونجوم الفن، واحتفلوا بعيد ميلاد الفنانة لبلبة، وقدموا لها أغنية عيد الميلاد الشهيرة، وسط تأثر وبكاء لبلبة، والتي حيتهم وغادرت المسرح بعدما أرسلت لهم مجموعة من القبلات.
