كاملة أبو ذكري عن تكريمها في القاهرة السينمائي: حاجة كبيرة أوي.. ومكنتش أتخيل أتكرم في المهرجان
تحدثت المخرجة كاملة أبو ذكري عن تكريمها في افتتاح مهرجان القاهرة السينمائي في دورته الـ 44، وذلك خلال لقائها في برنامج مساء DMC.
وقالت كاملة أبو ذكري عن تكريمها في مهرجان القاهرة السينمائي خلال لقائها: أتخضيت جدًا واتبسط جدًا وحاجة مكنتش في حسباني، وحتى أستاذ شريف عرفة لما أخدها فهو أستاذي، ولما قالولي حسيت إنها حاجة كبيرة أوي وشريط عمري عدى كله قدامي وحسيت إنه من أجمل الحاجات اللي حصلتلي في حياتي إني دخلت معهد السينما، وإني اشتغلت في السينما.
وأضافت كاملة أبو ذكري: أول حاجة جات على بالي لما كنت باخد دعوة بابا عشان كان بيتعزم دايمًا، وادخل أكبر مهرجان وكان نفسي انتمي للفنانين والمخرجين الكبار والناس اللي سابتلنا تاريخ كبير، ومكنتش أتخيل إني أتكرم في مهرجان كنت أتمنى إنه يدعوني، وفي مهنتي محظوظة بالناس اللي اشتغلت معاهم ومحظوظة باللي دعموني ومهنة السينما بتخليني اشوف العالم كله وتخلينا نتعامل مع أغنى واحد في العالم وأبسط وأفقر واحد في العالم.
واستكملت كاملة حديثها: أتعلمت من كتير منهم أستاذ نادر جلال وأستاذ رضوان الكاشف وأسامة فوزي ويسري نصر الله ومحمد خان كل دول دعموني وفيا حتة منهم، وأنا بعتبر نفسي محظوظة إني قابلت الناس دي واشتغلت مع الناس وصاحبت الناس دي رغم فرق السن.. هما سمحولي أبقى صاحبتهم ونخرج سوا ويحكولي وأحكيلهم، ورضوان الكاشف قالي خليكي حرة واوعي تعملي حاجة عشان ترضي اللي حوليكي ومتبقيش راضية نفسك، الفنان لازم تبقى روحه حرة وأستاذ يسري نصر الله هما الاتنين فتحولي قلبي وعيني على الحياة، وأستاذ أسامة فوزي وكان بيهتم بالسيناريو ثم السيناريو ثم الإخراج.
وأضافت كاملة: لازم الواحد يبقى مهتم بالسيناريو اللي هو أساس كل اللي بيطلع وعدم الاستسهال في الكتابة وإيه نقط الضعف اللي ممكن تبقى في الدراما، وأستاذ محمد خان اتعلمت منه سينما العالم كله، وراني سينما من العالم كله وهو اللي دفعني للإخراج.
وعن عودتها للسينما قالت كاملة أبو ذكري: بحاول أرجع تاني للسينما وكل اللي بيتعرض دراما والمجال أوسع واللي معروض دراما أو مسلسل، وقليل لما بلاقي فيلم وبسعى لفيلم بيني وبين الكاتب، لكن مفيش إنتاج مستنيين يبقى فيه سيناريو ونتحرك للإنتاج، اللي محتاجينه هو الورق والسيناريو هو أساس العمل ومحتاجين كتّاب للسينما عشان يعملوا سينما خيال ومحتاجين خيال جديد ونقدر بالتكنولوجيا نقدر نعمل حاجات كتير جدًا.
