أطلق اسمه على طفله الأول وتوفي في حادث سير.. حسن الرداد يكشف ذكريات جمعته بشقيقه الراحل
أطلق الفنان حسن الرداد، اسم شقيقه الراحل فادي على مولوده الأول من الفنانة إيمي سمير غانم، والتي وضعت طفلها أمس في أحد مستشفيات 6 أكتوبر.
ويستعرض لكم القاهرة 24 تفاصيل وفاة فادي شقيق حسن الرداد
سبق وكشف الفنان حسن الرداد تفاصيل وفاة شقيقه، وذلك خلال حواره مع الإعلامي عمرو الليثي، في برنامجه واحد من الناس، قائلًا: أخويا مكنش تعبان قبل وفاته بالعكس كان أطول مني وفيه صحة، وكنا راجعين من القاهرة عملنا حادثة وهو توفي، وبعدها بسنة والدي توفي.
وتابع: اكتشفت بعد كده صعوبة أنك تبقى كبير ومحروم أنك تعبر عن حزنك لأنك بتشد ناس حواليك، فاكتشفت إن الزعل رفاهية وعليك واجب أنك تخفف من اللي حواليك الآلام، ومش هلاقي حد بيحبني ويحافظ على سري أكتر من أخويا.
وأضاف، كاشفًا إحساسه وتفكيره عقب وفاة شقيقه: أنا حياتي كلها كنت مترابطة مع أهلي وكنت بعتمد على أخويا في كل حاجة في حياتي، كان سري وصديقي وكنت بحبه كأنه ابني لأني كنت بخاف عليه جدًا لأني أكبر منه، وفي نفس الوقت بعتبره أبويا، وبقيت حاسس إني في دنيا غريبة كأني مرمي في نص البحر، وهربت من الذكريات بـ إني جيت القاهرة علشان أدخل المعهد العالي للفنون المسرحية.
وعن آخر كلمات شقيقه قبل وفاته، فعلق قائلًا: هو كان مؤدب جدًا ودمه خفيف جدًا، وكان بيصوم اتنين وخميس وبيحفظ قرآن، وكان بيحب يصلي في الجامع دايمًا والفترة الأخيرة كان بيصلي الخمس فروض في الجامع، وآخر حاجة قالهالي قبل وفاته وكنت سايق العربية وحد زنق عليا روحت شاتم، راح قالي نفسي أشوفك مؤدب وتبطل تشتم.. هو مكنش بيحب يطلب حاجة ولا يكلف حد بأي مجهود، الله يرحمه كان جميل وأنا مفتقده.
