أبرز تصريحات أحمد سعد في هذا مكانك.. مادخلتش ثانوية عامة وزوجتي قدم السعد عليا وسر نجاحي
حل الفنان أحمد سعد ضيفًا على البرنامج السعودي هذا مكانك، وكشف سبب نجاحه الكبير مؤخرًا، كما تحدث عن دراسته، إلى جانب غنائه العديد من الأغاني الخاصة به.
وقال أحمد سعد عن سر نجاحه: أمي دعت لي وزوجتي وشها خير عليا، وبتدخل في كل حياتي، وكان وشها قدم السعد وبتحبني أطلع بشكل معين ودايمًا مركزة معايا.
وأضاف: الناس اللي بتحبك بيكون نصيحتهم ليك خالصة مفيهاش شوائب.. وطريقة النصيحة غريبة وصعبة لأني شخص مش بحب النقد، وهي بتنتقدني ليه عملت كده في الوقت ده وأنا أطلع مبررات بعد 10 دقايق أحس كلامها مظبوط.
مادخلتش ثانوية عامة
كما سُئِل المذيع أحمد سعد عن دراسته، ليرد: أنا ما دخلتش ثانوية عامة، لأن التقديم في معهد موسيقى عربية، بيكون بعد الإعدادية ولمدة 7 سنين، وهو في فنان يفهم في الكيميا والفيزيا.. دي حاجات صعبة على مستوى تفكير فنان.
وعن بصمة أغانيه في تترات المسلسلات، قال: المخرج محمد سامي بوجه له تحية هو حكاء أوي ويدخلك جوه المود، وبيحضرني كأنه بيحضر الممثل.
ووجّه المذيع سؤالًا إلى أحمد سعد قائلًا: أنت في مصر موجود في أي ليفل، لأن في ليفل العمالقة زي هاني شاكر ومحمد منير، وليفل آخر للكبار زي عمرو دياب وتامر حسني وحماقي.
ورد أحمد سعد قائلًا: ما أقدرش أحكمها بالليفيل، وأنا عندي توفيق كبير السنة دي، وغريب يكون عندك 4 أغاني كلهم ناجحين، لأن 4 أغاني في سنة واحدة نجاح كبير أوي وليفل أعلى من أي ليفل في حتة لوحده، لكن الناس دي تاريخ كبير وعدد سنين نجاحات، مش علشان نجحت مرة تبقى قد أكبر واحد فضل ناجح على مدار سنين، لأن الاستمرار هو أساس النجاح.
