شوبير يفتح النار على لاعبي الأهلي بعد خماسية صن داونز: محدش في إفريقيا عاوزك تتأهل
علق الإعلامي أحمد شوبير، على خسارة الفريق الأول للنادي الأهلي الثقيلة أمس أمام صن داونز بخمسة أهداف مقابل هدفين، خلال المباراة التي أقيمت بينهما في بطولة دوري أبطال إفريقيا.
وقال أحمد شوبير خلال تصريحات إذاعية: لا يوجد لاعب ظهر في النادي الأهلي خلال مواجهة صن داونز بشكل جيد، يمكن شوية بيرسي تاو ومحمد شريف وأفشة لما نزلوا كانوا بيجروا، لكن تقولي اصل لعبنا الساعة 3 العصر وده وقت صعب، كل دي حجج البطل بيلعب في أي وقت، ولعبنا كذا مرة في هذا التوقيت دون أزمة.
وأضاف شوبير: التحكيم كان مميز للغاية، ولم يستحق أي ضربة جزاء كما يتصور البعض، والملعب كام ممتاز، ومن أحسن ملاعب إفريقيا، والأهلي على طول بيلعب وسط حضور جماهيري كبير للمنافس، ولا يهمه يعملوا حفلة قبل الماتش أو يعملوا اللي هو عاوزينه الأهم الملعب.
وأوضح نجم الأهلي الأسبق، أن الاستحواذ وصل إلى 80% لصنداونز و20% للأهلي، ودي محصلتش، لدرجة أن الأهلي ميعرفش يبني هجمة، في الوقت اللي المنافس بيلعب عمياني حفظين بعض، وللعلم صن داونز دي أقوى فرقة في إفريقيا بلا منافس.
لما النتيجة وصلت 3\2 قولت الحمد لله
وأكمل الإعلامي أحمد شوبير: الشوط الأول انتهى بتقدم صن داونز بثلاثية، وما فيش فيهم ركلة جزاء ولا كورة ثابتة، كلها أهداف ملعوبة وتسديدات قوية من خارج منطقة الجزاء، انا مش متخيل أيه المنظر ده للأهلي مش عارفين يباصوا 4 نقلات على بعض، كان شكل مهين للجميع، بقيت قاعد نفسي الحكم يصفر من الخوف، لما النتيجة وصلت 3\2 قولت الحمد لله يارب تخلص كدا معننا خسرانين بس أحسن ما النتيجة تخرج بشكل أكبر، لأننا مش عارفين ولا نقفل اللعب ونفتحه، ومن هنا أنا مش فاهم، هل الدوري بتاعنا ضعيف ولا احنا اللي سيئيين ولا فيه إيه بالضبط.
وشدد في نهاية حديثه: الأهلي مفيش قدامه غير أنه يكسب الماتشين الجايين أمام القطن الكاميروني والهلال السوداني، وينتظر بقى بس مش هايحصل أن الهلال هيتعادل أو يخسر من صن داونز، أنسى، وانا قولت من بدري أندية القارة كلها عاوزاك تخرج من بدري، وأنا بقول الهلال هيكسب صن داونز ويتأهلا الثنائي وهو وصل خلاص.
