محمد مختار يهاجم رانيا يوسف: اديتها كل حاجة ومعايا مستندات.. ونادية الجندي الحصان الرابح
رد المنتج محمد مختار على اتهامات طليقته الفنانة رانيا يوسف، وذلك بعدما قالت إنه لا يصرف على بناته، كما كشف سبب تفضيله الإنتاج لـ نادية الجندي.
وقال محمد مختار في تصريحات تلفزيونية: أنا على مدى 5 سنين مردتش على رانيا يوسف ولكن الموضوع زاد، وأنا اديتها كل حاجة أعمل إيه تاني ومعايا مستندات فيها ختمي وبصمتي وحزين إني طالع أقول كدا.
وواصل محمد مختار: أنا فضلت الإنتاج لـ نادية الجندي عن رانيا يوسف لأنها الحصان الرابح وكان بقالنا 22 سنة مكسرين الدنيا، يبقى أغيرها ليه؟
رانيا يوسف: محمد مختار مش بيصرف على بناته
وسبق وهاجمت رانيا يوسف طليقها محمد مختار في تصريحات تليفزيونية سابقة: محمد مختار بيقول إنه بيصرف على بناته، طب أنا ليه رافعة قضية نفقة؟ وكان بيدي 1200 جنيه وبيمن على ولاده بيها وبيدفع المبلغ دا شهريًا وقررت ألجأ للقانون بعد ما تعبت من كتر ما بقوله أنت والد بناتي ومسئول عنهم ولازم تصرف عليهم وريقي نشف معاه.
وواصلت رانيا يوسف: وأنا بصرف على بناتي حاليا وفيه فرق إني بطالب الأب أنه يعمل مسئولياته وإني مش عايزة أصرف، بالعكس أنا بصرف عليهم عادي.
كما سبق وتطرقت رانيا يوسف للحديث عن سبب إنتاج طليقها لـ نادية الجندي بدلًا منها، قائلة: نادية الجندي مش مقياس للنجومية، وأنا عملت نجوميتي بنفسي ومحدش ساعدني حتى بمكالمة تليفون منذ دخولي مجال التمثيل.
