لوسي تكشف سر اختفاء سهير زكي: قررت تستريح لأنها تعبت واجتهدت
كشفت الفنانة لوسي، سر اختفاء الراقصة سهير زكي، والتي اختفت عن الأنظار منذ فترة طويلة، مؤكدة أنها على تواصل دائم معها.
وقالت لوسي خلال ندوة تكريمها في القاهرة 24: سهير زكي جوزت وفرحت ناس كتير وامتعتنا وأنا بتواصل معاها، واحنا بنتعب جدًا وهي اجتهدت وتعبت لحد ما وصلت لمكانة تستحقها وقررت تستريح، ودا حقها لأن الواحد أحيانا بيكون عايز يبعد عن الأضواء.
لوسي: الحرام والحلال حاجة جديدة علينا
كما علقت الفنانة لوسي، على تصريحات بعض الفنانين المعتزلين بشأن حرمانية الفن، وتبرير اعتزالهم بـ أسباب دينية، قائلة: الحرام والحلال حاجة جديدة علينا، وطول عمر الفنانين بيطلعوا ببدل الرقص والمايوه، وكان في مشاهد حميمية وبيتباسوا.
وتابعت لوسي: اللي بيحرم أنت إيه عرفك أني هروح النار ما يمكن أنا عند ربنا أفضل منك؟، والفن عموما مش حرام لأنه بيتعمل في النور، وأنا برقص واللي مستحرم يدعيلي ميحضرش حفلات.
وأضافت: لو توفيت بـ بدلة الرقص ربنا هيسترني، وأنا عندي صفحة عند المولى عز وجل وكاتب فيها حياتي، هل لما أموت هيقولي خشي يا لوسي النار عشان بترقصي؟ يمكن أنا بعمل حاجات أحسن من الرقص.
أعمال لوسي
وعلى جانب آخر، حققت الفنانة لوسي نجاح كبير في مسلسل المداح 3، والذي يُعرض خلال المارثون الرمضاني الجاري، وشارك به عدد كبير من النجوم، أبرزهم: حمادة هلال، يسرا اللوزي، هبة مجدي، دنيا عبد العزيز، محمد رياض، حنان سليمان، أحمد ماهر، والعمل من تأليف أمين جمال، وإخراج أحمد سمير فرج.
