محمد فراج: مسلسل حرب توافرت به عوامل النجاح.. وأُحيي أحمد نادر جلال على اختياره أحمد السقا
تحدث الفنان محمد فراج، عن مشاركته في مسلسل حرب، بجانب الفنان أحمد السقا، والذي عُرض في الماراثون الرمضاني 2023، وحقق من خلاله نجاحا كبيرا لدى الجمهور.
محمد فراج: مسلسل حرب توافرت فيه عوامل النجاح
وقال محمد فراج في تصريحات لـ القاهرة 24، عن مشاركته في مسلسل حرب، وتوقعاته لردود أفعال الجمهور: أنا دايمًا لما بشتغل في حاجة بتمنى تكسر الدنيا لفترة قليلة وبعدين بنسى لأني بتشغل جوا الحاجة دي، مفيش حد في الدنيا بيشتغل ومش بيبقى عايز شغله مينجحش، في عوامل كتير لازم تبقى موجودة علشان ربنا يكتب النجاح والتوفيق، ولكل مجتهد نصيب.
أما عن عوامل النجاح التي توفرت في مسلسل حرب، فعلق محمد فراج قائلًا: كل العوامل داخل العمل كانت مغريبة بالنسبة لي ومطمئنة، زي وجود مخرج زي أحمد نادر جلال أعرفه من 14 سنة، وأعتقد هو بعد ربنا سبحانه وتعالى في السينما له فضل عليا، لأنه خدني في فيلم 1000 مبروك في 2009 مع أحمد حلمي، واشتغلت معاه 5 مرات وعلاقتي بـ فنيًا وإنسانيًا من أحسن ما يكون، وهو إنسان مهم جدًا عندي وأيضا وجود أحمد السقا، الذي كان إضافة قوية للعمل.
مسلسل حرب
وتابع: أحمد نادر جلال بيشتغل بطاقة وبيموت نفسه في اللوكيشن، وبيعرف يحتوي الممثل اللي قدامه مهما كان تقيل أو لسة مبتدئ، وبالتالي الممثلين اللي معاه بيطلعوا أحسن ما عندهم، وأحمد نادر جلال زي ما هو من أول معرفتي به من 2009 على المستوى الإنساني، وعلى المستوى الفني علي كتير جدًا.
وعن كواليس تعاونه مع الفنان أحمد السقا، قال محمد فراج: وجود أحمد السقا في المسلسل كان مطمئن، هو فنان كبير، وبقول للمخرج أحمد نادر جلال برافو على اختيارك لـ أحمد السقا، إنك تلبس أحمد السقا عباية جديدة عليه إنه يمر بها كممثل ويغير جلده ويبقى في مكان مختلف، بالإضافة إلى شركة الإنتاج، مبخلتش خالص على المشروع، كل دي عوامل مفيش أحلى من كدة.
