محمد فراج: لما بشتغل في رمضان ببقى أسير الشغلانة.. وفرحت لما مسلسل بطن الحوت خرج من السباق الرمضاني
كشف الفنان محمد فراج، سبب خروج مسلسله بطن الحوت من السباق الرمضاني 2023، بجانب حديثه عن تحضيرات شخصيته في مسلسل حرب، والذي حقق من خلاله نجاح كبير في الموسم الرمضاني.
وقال محمد فراج عن تحضيرات شخصيته في مسلسل حرب، خلال حواره مع القاهرة 24: فكرة تحضير الشخصية دي أنا كنت قلقان منها، وركبي بتخبط في بعض، لأن أنا كنت بعمل مسلسل تاني اسمه بطن الحوت، ولظروف إنتاجية تقرر تأجيل تصويره وخروجه برا السباق الرمضاني زيه زي أي مسلسل، وقولت الحمد لله هستريح ورمضان هيعدي عليا كبني آدم طبيعي، ولكن ربنا مكنش رايد ده، وكان له إرادة في حاجة تانية، إن في نفس اليوم اللي عرفت فيه من المنتج والمخرج إني خارج السباق الرمضاني، كلمني في التليفون الأستاذ أحمد نادر جلال وبعده شركة الإنتاج علشان مسلسل حرب.
محمد فراج: محستش بـ إحباط بعد خروج مسلسل بطن الحوت من رمضان 2023
وأكد محمد فراج أنه لم يحزن بسبب خروج مسلسل بطن الحوت من السباق الرمضاني، قائلًا: محستش بـ إحباط بعد خروج مسلسل بطن الحوت من موسم رمضان 2023، لأن ربنا عارف ده ومكتوب في كتابي هيحصلي إيه في حياتي، فأنا هزعل ليه؟، الفكرة في الوقت وربنا بيسبب الأسباب، فأنا لا ندمان ولا زعلان ولا بحب أندم.
محمد فراج: مكنتش أعرف حاجة عن لعبة الشطرنج قبل مسلسل حرب
وأضاف: أنا أقسم بالله فرحت لما عرفت إن مسلسل بطن الحوت خرج من السباق الرمضاني، لأني هرتاح عشان بموت في رمضان من الشغل والصيام، ومش بشوف أهلي ولا مراتي ولا بيتنا، ببقى أسير الشغلانة، وكلنا كده اللي بيشتغلوا في الشغلانة دي، ومع مرور الوقت بتبقى حاجة مُهلكة نفسيًا جدًا.
كما تحدث محمد فراج، عن مشهد لعبة الشطرنج في بداية مسلسل حرب، قائلًا: مكنتش أعرف حاجة عن لعبة الشطرنج قبل مسلسل حرب زيكم، ودي لعبة دولية وبيتعمل لها بطولات، وهاني سرحان مؤلف العمل لما كتبها ناس كتير مكنتش تعرف حاجة عنها، ودي حاجة حلوة في المسلسل، أنه وجه نظر الناس والاتحادات الرياضية لـ لعبة منعرفش عنها حاجة، عشان نشوف ونعرف ونجهز ليها.
