جمال العدل: يسرا ركن ركين في الدراما.. وهي عادل إمام الستات
تحدث المنتج جمال العدل، عن علاقته وشركة العدل جروب بالفنانة يسرا، وذلك بعد نجاحاتهم المتتالية على مدار السنوات الماضية في الدراما الرمضانية، وآخرهم مسلسل 1000 حمدالله على السلامة.
وقال جمال العدل إن الفنانة يسرا هي من طلبت تقديم عمل كوميدي في رمضان 2023، مُشيرًا إلى أنه كان سينتج لها عملا آخر، موضحًا: الكوميديا طول الوقت مطلوبة وأكتر حاجة في رمضان، ولازم يكون في أنواع مختلفة في الموسم الرمضاني، ويسرا صاحبة الاختراع أصلًا إننا نعمل كوميدي السنة دي، ومكنتش هعمل لها المسلسل ده خالص وهي قالتلي علشان الناس وخلينا كوميدي السنة دي كمان وعملنا مسلسل 1000 حمدالله على السلامة.
وتابع: مسلسل 1000 حمدالله على السلامة فيه ضيوف شرف كتير جدًا نص مصر موجودة فيه، وطلبت من النجوم الشباب يجولي المكتب بعد رمضان عشان نحطهم في قوالب جديدة وينطلقوا وده دورنا.
وأضاف: بنقول المخرج رب العمل لأنه مسؤول عن الملابس والألوان وكل حاجة في العمل ولازم كل حاجة تبقى لايقة مع بعض، وهو مسلسل كوميدي ولازم يكون مبهج، والحمد لله ربنا وفقنا وكان في رد فعل كويس.
جمال العدل: يسرا عادل إمام الستات
وتطرق المنتج جمال العدل في حديثه إلى العلاقة التي تجمعهم بالفنانة يسرا، قائلًا: يسرا السنة دي جريئة ولكن مسكت شخصتها من الأول للآخر مخرجتش عنها، وهي تاريخ طويل في الدراما والسينما والعلاقات الإنسانية، وعلاقة شركة العدل جروب وبينها، أنا عامل مع يسرا حوالي 20 عمل، يعني تاريخنا مع بعض يسمح لنا إننا نعمل أي حاجة سوا وندخل أي تجربة سوا.
كما شبه الفنانة يسرا بالزعيم عادي إمام، قائلًا: يسرا مش ركن ركين في شركة العدل جروب بس، دي ركن ركين في الدراما ودايمًا بقول عليها عادل إمام الستات، وهي وعادل إمام والفخراني اللي نطلع معاهم شباب ونبقى متطمنين، يسرا ست الستات.
