مش عارف أقرب من ربنا في بلدي.. خالد الفايد يكشف تفاصيل سفره خارج مصر خوفًا من تهديدات هاني محروس
كشف مطرب ذا فويس المعتزل خالد الفايد، تفاصيل أزمته مع المنتج هاني محروس، وسبب سفره خارج مصر بعد اعتزاله منذ شهرين، مشيرًا إلى أن محروس يهدده بعد اعتزاله الغناء كونه كان ملتزمًا معه بعقد وشرط جزائي ولم يلتزم بالمدة المحددة بالعقد.
وقال خالد الفايد في بث مباشر عبر القاهرة 24: كنت ماضي مع شركة تابعة للمنتج هاني محروس قبل اعتزالي الغنا من شهرين، ومش بدور على تريند ولا عاوز أي حاجة لكن نفسي أقرب من ربنا وأعبده في سلام وصمت، ولكن لما بطلت غنا مالقتش ده كله.
وأوضح خالد الفايد: بعد اعتزالي هاني محروس بعت تهديد لأهلي بيقول لهم القانون بينا، وكان بيجي لي تهديد من ناس تعرفني وناس على علاقة وثيقة به وقالوا لي أنه هيمشي في إجراءات وقضايا وأنا معنديش طاقة أقف قصاده في محاكم، بعدها بيومين مشيت من مصر لما جالي رسائل تهديد منه، وبره مصر بقى لي شهر ونص وربنا يعلم أنا في كرب ونفسيتي زي الزفت علشان عاوز أعبد ربنا في سلام وصمت ومش عاوز تريند، وعاوز ربنا يوفقني أعبده في صمت وبس.
مش عارف أقرب من ربنا في بلدي مصر
وتابع خالد الفايد: مش عارف أقرب من ربنا في بلدي مصر اللي هي بلدي الإسلامية، ومش عارف أصلي فيها من التهديدات ولا عارف أمارس عبادتي من القلق والخوف والتوتر ومش عارف أوصف لكم بمر بإيه، ولما هددني خدت بعضي ومشيت من مصر لأني مش هقدر أعيش في بلد مهدد فيها بالحبس.
واستكمل: والبعض بيسألني مضيت ليه على الشرط الجزائي، مضيت علشان عارف أن ربنا عالم بظروف الناس والدنيا غلا، وحاليًا حالتي المادية ضايعة وحالتي الدينية أضيع ومش عارف اصلي في مساجد ومفيش مسجد قريب ومفيش صحبة صالحة وحسبي الله ونعم الوكيل ولو القانون بينا أنا ربي بيني وبينك.
وأردف خالد الفايد: هاني محروس كان بيديني 600 جنيه في الأسبوع مش هجيبوا ولا يودوا والشرط الجزائي عليا أنا بس، وأنا مش عاوز أغني معاه ولا مع غيره لأني بطلت السكة دي وبطلت أي سكة فيها معصية لله.. ليه عاوز تحرمني أنا مش طايق أعمل أي معاصي تاني خالص وبعت له ناس يكلموه ويهدي الموضوع ويحل الموضوع ودي ولكنه قال دي إجراءات وهكمل فيها.
