غادة عبد الرازق: كلنا علينا أقساط.. وصرفت فلوسي في تفاهات
حرصت الفنانة غادة عبد الرازق، على تصحيح الفكرة النمطية المأخوذة عن حياة الفنانين، حيث يفكر بعض الجمهور بأن الفنان حياته خالية من الصعوبات والتعثرات المادية.
وقالت غادة عبد الرازق خلال حوارها مع القاهرة 24: كلنا علينا أقساط، والناس مش بتصدق ده على الفنانين، بس الحقيقة إن ربنا بيدي كل إنسان على قد شيلته، يعني لو في شخص بيقبض مليون جنيه.. تأكد إنه شايل 20 شخص مثلا.
وأضافت: إيه المشكلة لما فنان يبقى عنده أقساط، دي حاجة مش عيب، والناس مش فاهمة إن حتى نجوم الصف الأول بييجي عليهم وقت ممكن يقعوا ويحصلهم مشاكل مادية في حياتهم.
وأكملت: إحنا التمثيل زي البورصة بالظبط، وكمان ساعات بيكون تفكير الشخص غلط، وبيكتشف بعد فوات الأوان إنه حط فلوس في أماكن غلط، فاضطر إني أشتغل تاني عشان أعوض التفاهات اللي صرفت عليها فلوسي.
وسبق وتحدثت غادة عبد الرازق عن الانتقادات التي تتعرض لها الأعمال الفنية باستمرار، موضحة أن الجمهور لا يتقبل أن يغير الممثل من شكله، قائلة: الجمهور بقى من أول حلقة لأي عمل يفضل ينتقده، ده كمان بقى بينتقد من أول ما البوستر ينزل، زي ما عملوا مع مسلسل تحت الوصاية.
مسلسل تلت التلاتة
يعد مسلسل تلت التلاتة آخر عمل قدمته الفنانة غادة عبد الرازق، حيث عرض في موسم رمضان الماضي، وشارك في بطولة العمل عدد من الفنانين، أبرزهم الفنان محمد القس، أحمد مجدي، ليلى أحمد زاهر، نجوى فؤاد، وآخرين.
