شقيق أنغام: أختي الوحيدة اللي تستحق لقب صوت مصر بعد أم كلثوم
علق الموسيقار خالد محمد علي سليمان، شقيق الفنانة أنغام على الجدل المُثار مؤخرًا بين الجمهور على مواقع التواصل الاجتماعي حول من يستحق لقب صوت مصر، أنغام أم شيرين عبد الوهاب.
وقال الموسيقار خالد محمد علي سليمان، شقيق أنغام، في تصريح خاص لـ القاهرة 24: أنغام الوحيدة في زملائها اللي عارفة قيمة بلدها وأنها واجهة لبلدها، وهي مش مستنية شكر، ولكن دي الحقيقة ودي مسؤولية هي بتحافظ عليها، والتريند رقم 1 مكتوب صوت مصر أنغام، بعد حفلة صوت مصر كل المطربين قالوا على نفسهم صوت مصر.
وتابع: لقب صوت مصر ده مظهرش غير على أنغام أصلًا، ولما أعادوا إنتاج النشيد الوطني أنغام هي اللي غنته، لأنها الوحيدة الجديرة أنها تكون صوت مصر، وعمر ما اتقال صوت مصر على حد غير أنغام، وأنغام الجديرة بعد أم كلثوم يتقال عليها السلطانة وصوت مصر.
وأضاف: بين كوكب الشرق وصوت مصر أنغام مفيش ألقاب تانية، وأي لقب تاني يبيقى صاحب الاسم بيطلقه على نفسه، وأنغام بتقول على نفسها هاوية، وهي عمرها ما شكرت في نفسها، ومفيش لقب يتقال بعد كوكب الشرق غير صوت مصر أنغام.
خلاف أنغام وشيرين عبد الوهاب
ومن جهة أخرى، سبق وكشف إيهاب صالح، مدير أعمال الفنانة شيرين عبد الوهاب، حقيقة خلافها مع أنغام بعد تصريحاتها التلفزيونية الأخيرة، والخلاف على من أحق بلقب صوت مصر، وكتب عبر حسابه بموقع تويتر: لكل جمهور شيرين وأنغام، شايف بقالي كذا يوم كلام كتير رايح جاي في قصة الألقاب ومين صوت مصر ومعركة كلامية داخلة في منطقة مش لطيفة خالص.
وتابع: أنا الحمد لله علي علاقة قوية بالنجمتين بقالي أكتر من 15 سنة، وكل الوسط يعرف ده كويس جدًا، شيرين بتحب أنغام وبتحترمها من زمان وأنغام طبعًا بتبادلها نفس الإحساس، كل الكلام والإشاعات العجيبة إن أنغام ورا مشاكل حسابات شيرين على السوشيال ميديا ده كلام ملوش أي صحة من الأساس، وأنا في المطبخ وعارف كويس جدًا إيه سبب المشكلة.
واختتم حديثه قائلًا: من حق جمهور كل نجمة يغير ويحب نجمته يدافع عنها، بس طبعًا من غير غلط وتجريح عشان إحنا أرقى من كدة، خلاصة الكلام شيرين وأنغام دول أصوات مصر وقيمة كبيرة عندنا وفي الوطن العربي.. استهدوا بالله كدة.
