وفاء عامر تدافع عن ياسمين عز: الست خلقت من ضلع الراجل وكان ربنا قادر يخلقها من رجله | فيديو
دافعت الفنانة وفاء عامر عن الإعلامية ياسمين عز، خلال استضافتها اليوم في برنامج كلام الناس عبر شاشة إم بي سي مصر، مؤكدة أنها ليست ضد المرأة ولكنها مع عمار البيوت.
وقالت وفاء عامر: ياسمين عز مش ضد المرأة، ولكنها مع العمار، ومع بناء البيوت ومع الست طويلة البال، ومع الست اللي تربينا وطلعنا لقينها، الست خلقت من ضلع الرجل اللي هو قريب من القلب، وكان ربنا يقدر يخلق الست من رجل الراجل علشان يدوس عليها.
وأضافت وفاء عامر: ياسمين عز مع الست اللي لما تحترم الراجل هيحترمها، لما يكون لها ملك يستحق تكون له ملكة، لما يكون لها أمير يستحق تكون له أميرة، ومش قاصدة إهانة للمرأة، ياسمين عز ضد إنه يكون فيه طلاق وتفسخ مجتمعي وعش مهجور وبيوت مهدومة.
وتابعت وفاء عامر موجهة حديثها إلى ياسمين عز: أنا بشكرك لأن ده هو المقصد اللي دخل قلبي، وأي حد يتنمر براحته ولكن إحنا هنفضل نبني وهنفضل نقول للست تعامل جوزها إزاي وتحضتنه، ولو قالت له كلمة حلوة هيبقى هو عاوز يرضيها، والراجل له قوامة في كل حاجة في شجاعته وفي إحساسه بالمسؤولية، فلما الست تحضتن كل ده وتبستم في وشه وتقول له دوس على السرير واعمل اللي أنت عاوزه أكيد هيبستم وهتنزع منه كل حاجة وحشة جواه فيا ريت نبطل تنمر ونفهم بس.
وأردفت وفاء عامر قائلة: فيه نوعية من الستات مش كل الستات لو عندها لمبة في البيت اتحرقت أو مشحنتش كهربا تفضل مخلية البيت ضلمة لحد ما الراجل يجي يبقى هو اللي بيغير اللبمة، فهو بيحس إنها محتجاله طول الوقت وفي ست مسترجلة وبتعمل كل حاجة بنفسها، لازم يبقى فيه وسط.
ياسمين عز لـ وفاء عامر: أنت من الستات المفضلات ليا
من ناحيتها وجهت ياسمين عز رسالة إلى وفاء عامر قائلة: أنت من نوعية الستات المفضلات بالنسبة ليا، لأن كل تصريحاتك قبل ما نعرف بعض، بتلمسني من جوه، لأنك عارفة قيمة الست وفي نفس الوقت بتحترمي الرجل، وعمرك ما شفتك في تصريح أو حوار ند بند مع أنك شخصية قوية ونجمة.
