علي صبحي: أخدت معزة تنام معايا على السرير بسبب فيلم
علق الفنان علي صبحي على انتشار ضحكة شخصيته في مسلسل تحت الوصاية، الذي عُرض في الموسم الرمضاني 2023، بجانب حديثه عن كواليس فيلم علي معزة وإبراهيم.
وقال علي صبحي في لقائه مع الإعلامية سهير جودة: موضوع الضحكة بتاعتي في المسلسل الناس أول ما بيشوفوني بيقولولي أضحك الضحكة أو هما بيضحكوا الضحكة، والحمدلله ده فضل من ربنا كبير جدًا أن الشخصية تنجح والناس تحبها بغض النظر أنها كانت سخيفة أو شخصية رخمة لكن قدروا يحبوها عشان شافوا الجانب الإنساني اللي فيها.
وتابع علي صبحي: الحمدلله المخرج محمد شاكر كان حساس مع جميع الشخصيات وعاملها باحترافية شديدة جدًا، وده مش مجهودي لوحدي ده مجهود كل الناس أن الشخصيات تطلع بالصدق ده للجمهور.
واضاف علي صبحي عن ترند ضحكة عيد في مسلسل تحت الوصاية، قائلًا: الحمدلله ربنا بيديني الحاجة في وقت أنا مستعد ليها، نجاح الضحكة ده مش أنا بس اللي مسئول عنه، اللي مسئول عنه معايا المخرج محمد شاكر واختياره لـ اللحظات اللي هيتحط فيها الضحكة دي كانت هي المفتاح لنجاح الضحكة.
علي صبحي يتحدث عن فيلم علي معزة وإبراهيم
كما كشف الفنان علي صبحي كواليس فيلم علي معزة وإبراهيم، وعن سر نوم معزة بجانبه على السرير، حيث قال إنه قبل انتهاء التصوير بأسبوع جاءوا بمعزة تُدعى نادية في سيناريو الفيلم، مُعلقًا: قررت أخدها معايا البيت وباتت معايا فعلًا على سرير واحد، وكان أول يوم لوجود المعزة في البيت مراتي كانت مسافرة، وكانت تجربة خطيرة.
وأشار علي صبحي: أنه يمكن أن يربي أي حيوان إذا جاءت الفرصة، موضحًا أنه لا يقوم بشراء الحيوان، ولكنه يقوم بإنقاذهم ومساعدتهم ويمكن أن يوفر لهم مكان آمن.
وأوضح علي صبحي، أن تواجده في منطقة السيدة زينب ليس وراءه سر، وسبب تواجده في هذا المكان يرجع إلى وجود طاقة إيجابية في هذا المكان، فهو محب جدًا للسيدة زينب، ويحرص على حضور مولد السيدة زينب ويستمع للإنشاد والمدح.
