رحاب الجمل عن فيلم مستر إكس: بذلنا مجهود رهيب والكواليس كلها ضحك
تحدثت الفنانة رحاب الجمل عن كواليس فيلم مستر إكس بطولة الفنان أحمد فهمي، الذي عُرض في موسم عيد الأضحى الماضي.
وقالت رحاب الجمل خلال مداخلة هاتفية في برنامج كلاكيت عبر إذاعة نجوم إف إم: يارب يكون تعبنا وحبنا للفيلم وصل للجمهور ولكل اللي شافوا الفيلم، فرحانة لما بدخل على السوشيال ميديا عموما ردود الأفعال مبهرة والناس مبسوطة بالفيلم والناس بتقول إن الفيلم صيفي وأحلى مما توقعوا وشبابي.
وأضافت رحاب: عملنا مجهود رهيب وإحنا شغالين، وفيه سنة وشوية قبل التصوير أحمد فهمي والمخرج الجميل أحمد عبد الوهاب وأمجد الشرقاوي اشتغلوا فيها على الورق، وأنا كنت متحمسة جدا؛ لأنها تاني تجربة ليا مع النجم الفنان الإنسان أحمد فهمي مش عارفه أقول إيه لساني بيعجز إنه يوفيه حقه بجد، من أجمل الناس اللي اشتغلت معاهم أخلاقيًا وفنيًا بيحبنا كلنا ومهتم بينا كلنا وفرحان بينا كلنا.
كواليس فيلم مستر إكس
وأردفت رحاب الجمل: الضحك في الكواليس مش بيقف وبنحب بعض بجد، وفيلم مستر إكس من الأعمال القليلة جدًا اللي اشتغلت فيها ببقى بخلصها وهعيط إنها خلصت وكلنا كنا متضايقين، ويوم عرض الفيلم كنت فرحانة إني هشوفهم كلهم وكان يوم مبهج إني هشوف نفس الناس.
أما عن تعاونها مع الفنانة هنا الزاهد، قالت رحاب الجمل: هنا الزاهد دي بونبوني دي الفراشة ودمها سكر ورقيقة جدا، حتة شيكولاته بتاعت الفيلم، هي وأحمد فهيم ليهم كيميا مع بعض وربنا يباركلهم، أما أوس أوس بيعمل مقالب محدش نجا منه ومن مقالبه، هو عامل زي الطفل الشقي وطيب جدا وبيضحكنا طول الوقت وبيجيبلي الكلام والله، أستاذ أحمد عبد الوهاب كل شوية يقولنا والنبي سيطروا عايزين نشتغل.
