يا سعدك يا هناك.. ياسمين عز تكشف مميزات الزواج من طبيبة وموظفة في بنك
كشفت الإعلامية ياسمين عز، مميزات الزواج من طبيبة ومن موظفة في البنك، وذلك خلال حلقة اليوم من برنامجها كلام الناس عبر شاشة إم بي سي مصر.
وقالت ياسمين عز عن مميزات الزواج من طبيبة: لو حظك وقعك في دكتورة يبقى ربنا بيحبك والحاجة راضية عليك، لإن جوازك من دكتورة وحدة رعاية مركزة متنقلة مفيش أحسن من كده، ومفيش ست هتهتم بيك زيها ورعاية في أكلك وصحتك وولادك وفي قلبها طيبة وحنية رباني مش مكتسبة ووشها مبستم وصوتها شتوي طول الوقت ومثبتاه على رقم عشرين.
وأضافت ياسمين عز: عمرك ما تلاقي دكتورة صوتها عالي وعمرك ما هتلاقي واحدة تعمل لك ضغط أو أرق، وعمرها ما هتسيب لك طلبات البيت لإنها عارفة إن خطها محدش بيعرف يقراه غير الصيدلاني، فهتجيب الحاجة بنفسها، وإوعى تسمع اللي يقول لك معقدين ومش بتوع حب ولا جواز، الدكتورة بتكون حكيمة، ده غير إنها صبرت على سبع سنين طب فوق سنوات امتياز يعني ست جبل وهتلاقيها واقفة في ضهرك ومستحملاك ولا أجدعها راجل.
كما كشفت ياسمين عز مميزات الزواج من موظفة في البنك، قائلة: حاجة تانية خالص، يا بختك يا حظك يا سعدك يا هناك، لأنك اتجوزت الشياكة والأناقة كلها في اللبس والشعر والميكب وكل حاجة مظبوطة على الشعرة وهتحس إنك متجوز موديل وفي إدارة كاملة اسمها كواليتي كنترول بتمر كل فترة في البنك تطمن على مظهرها وأناقتها، وبالتالي مش هتتحاج تقول لها اهتمي بنفسك، وهي الوحيدة اللي مش بتتخن وتاكل ومش بتتخن ومحافظة على رشاقتها ووزنها وكرشها مفرد ورقبتها عمود، ومواعيدها ثابتة وبتروح بميعاد وتمشي بميعاد، وصوتها واطي على طول بحكم احتكاكها بالعملاء وتلاقيها بتصوصو وعمرها ما تنده لك في البيت غير بيا فندم ورضاك مهمتها الأساسية، وأنت العميل رقم واحد في حياتها.
وأردفت ياسمين عز: أكتر واحدة تظبط لك ميزانية البيت، وهتعمل لك ألف حساب لإن الحساب ده شغلتها، ورصيدك عندها مش بيخلص وعمرها ما تطلب أي باسورد يخصك لإنها ماشية بمبدأ نحن نحافظ على سرية بياناتك.
