ماندو العدل: ع الزيرو كان هينجح أكتر في العيد.. ومحمد رمضان مابيهربش من المنافسة
كشف المخرج ماندو العدل سبب عرض فيلم ع الزيرو خارج موسم عيد الفطر، مؤكدًا أن محمد رمضان لا يهرب من المنافسة.
وقال ماندو العدل في تصريحات إذاعية: اضايقت جدا من الناس اللي بيقولوا محمد رمضان عرض فيلم ع الزيرو خارج موسم عيد الفطر لأنه هرب من المنافسة، وبقول لهم أن محمد رمضان عمل أكتر من 10 أفلام في الأعياد ونجحوا عنده جمهور بيروح له في الأعياد ومصلحتي كـ مخرج أن ع الزيرو يتعرض في العيد.
وأضاف ماندو العدل: الناس بتنزل من بيتهم يروحوا يتفرجوا على محمد رمضان والمنافسة مش حرب ولا خناقة، بالعكس الأحسن يكون عندنا تنوع في السينما وأفلام كتير وممكن اللي مينجحش النهاردة ينجح بكرا، إنما ليه بيقولوا هربنا من المنافسة؟ دا فيلم ع الزيرو لو عرض في العيد كان هيحقق إيرادات أكتر ونفس الكلام ينطبق على هنيدي لو فيلمه أتعرض في العيد كان هينجح أكتر.
فيلم ع الزيرو
كما سبق وتطرق ماندو العدل للحديث عن فيلم ع الزيرو، قائلا: فيلم ع الزيرو مكتوب لـ محمد رمضان مخصوص لأننا اتفقنا عليه من 5 سنين ولكن اتأجل ساعتها وبعدها كل واحد فينا انشغل ورجعنا نتكلم عن الفيلم السنة اللي فاتت وبدأنا تصويره وخلصناه في 4 أسابيع، وحبيت الفيلم لأن رسالته مهمة وبيتكلم عن معاناة محدودي الدخل مع مرض السرطان وحاولنا نكون صوت لهم.
